Jambyl oblysynda bir jylda 33 myń gektar orman órtendi

ASTANA. KAZINFORM – 2025 jyly Jambyl oblysy aýmaǵyndaǵy memlekettik orman qory jerinde 50 orman órti tirkeldi.

Eń iri órtter Aqkól ormanshylyǵynda bolǵan. Bul aýmaqta ot shamamen 22 myń gektar jerdi sharpyǵan. Sondaı-aq Moıynqum, Baızaq, Sarysý, Jambyl aýdandarynda jáne oblystyń ózge de birqatar aýmaqtarynda órt oqıǵalary tirkeldi.

Órtterdiń negizgi sebebi naızaǵaı túsýimen baılanysty boldy. Osy faktor saldarynan barlyq órttiń jartysynan astamy shyqqan. Sonymen qatar ákimshilik aýmaqtardan ottyń orman alqaptaryna ótýi jáne órt qaýipsizdigi talaptarynyń buzylýy da anyqtalǵan. 14 jaǵdaıda órttiń shyǵý sebebin anyqtaý múmkin bolmady.

Aımaqtaǵy aýqymdy órtterge baılanysty orman alqaptaryn qorǵaý sharalary kúsheıtildi. Ormanshylyqtarda 39 órt-baqylaý munarasy jumys kúıine keltirilip, 65 bekette táýlik boıy kezekshilik uıymdastyryldy.

Budan bólek, jalpy uzyndyǵy 11 myń shaqyrymnan asatyn mıneraldandyrylǵan órtke qarsy jolaqtardy kútip ustaý jumystary tolyq kólemde atqaryldy.

Ótken jyly orman sharýashylyǵy mekemeleriniń materıaldyq-tehnıkalyq bazasyn nyǵaıtýǵa jergilikti bıýdjetten 100 mln teńge bólindi.

Sonymen qatar lızıngtik qarjylandyrý aıasynda jalpy quny 1,8 mlrd teńge bolatyn 59 órtke qarsy tehnıka satyp alý josparlanǵan. Onyń bir bóligi ormanshylyqtarǵa jetkizilgen.

Aıta keteıik, Batys Qazaqstanda turǵyn úıdegi órtter sany kóbeıip otyr.