Jambyl oblysynda bir top jigit kópshiliktiń kózinshe qyz alyp qashqan

TARAZ. KAZINFORM — Jambyl oblysynda birneshe jigitten quralǵan belgisiz top qyzdy kópshiliktiń kózinshe kólikke kúshpen otyrǵyzyp, alyp qashqan. Belgili bolǵandaı, biraz ýaqyttan keıin qyz bosatylǵan jáne zardap shekpegen. Alaıda polıtsııa bul jaǵdaı boıynsha «Adam urlaý» baby boıynsha qylmystyq is qozǵady, dep habarlaıdy Kazinform tilshisi.

Áleýmettik jelilerde taraǵan beınejazbada birneshe adamnyń qyzdy kúshtep kólikke otyrǵyzyp jatqany anyq kórinedi. Aldyn ala málimet boıynsha, oqıǵa turmys qurý maqsatyndaǵy «alyp qashý» operatsııasymen baılanysty bolýy múmkin. Polıtsııa departamenti atalǵan derek áleýmettik jelilerdi monıtorıngteý kezinde anyqtalǵanyn málimdedi.

— Atalǵan fakti boıynsha tekserý júrgizilip, nátıjesinde oqıǵaǵa qatysy bar barlyq tulǵalar anyqtalyp, tergeýge alyndy. QR Qylmystyq kodeksiniń 125-baby — «Adam urlaý» boıynsha sotqa deıingi tergeý bastaldy. Taraptardyń burynnan tanys bolǵany jáne ózara shaǵymdary joq ekeni anyqtaldy, — delingen vedomstvo málimetinde.

Eske salaıyq, atalǵan bap boıynsha qoldanylatyn jaza bıyl kúsheıtildi. Endi adam urlaǵandar jeti jylǵa deıin bas bostandyǵynan aıyrylýy múmkin.

Oqıǵa áleýmettik jelilerde qyzý talqylanyp jatyr. Pikir jazýshylar qatysýshylardy «jabaıylar» dep atap, názik jandylardyń birneshe er adamǵa qarsy tura almaıtynyn aıtyp, ashý bildirgen. Keıbiri máseleniń túp-tamyry tárbıede jáne qoǵamda qalyptasqan moraldyq ustanymdarda dep esepteıdi. Kóptegen qoldanýshy beınejazbadaǵy kóriniske baılanysty emotsııalaryn jasyrmaı, qatyń pikir bildirgen.

Belgili bolǵandaı, kýágerlerdiń reaktsııasyna qaramastan, qyz jaqyn mańdaǵy bir qıylysta bosatylyp, kólikten óz erkimen shyqqan.

Polıtsııanyń málimetinshe, qazirgi ýaqytta sotqa deıingi tergeý amaldary jalǵasyp jatyr.

Aıta keteıik, endi qyz alyp qashqandar qylmystyq jaýapkershilikke tartylady.