Jambyl oblysynda bir top jigit 14 jasar oqýshyny zorlady

TARAZ. KAZINFORM – Jambyl oblysynyń Qordaı aýdanynda 14 jasar jasóspirim qyz zorlandy.

Oqıǵa osydan 15 kún buryn oryn alsa da, jábirlenýshige kúni búginge deıin eshqandaı psıhologııalyq kómek kórsetilmegen. 26 maýsymda bolǵan oqıǵanyń genetıkalyq zertteý nátıjesi daıyn bolmaı, is qozǵaýsyz tur. Óz kinálaryn moıyndap, bolǵan iske kýálik etken kúdiktiler bolsa da, olar qamaýǵa alynbaǵan. Quzyrly organdar da áli tıisti nazar aýdarmaı keledi. 

Jýrnalıster men quzyrly organdardan kómek suraǵan jábirlenýshi taraptyń sózine súıensek, kúdiktiler qyzdy «Anań uıyqtap qalǵan kezde syrtqa shyq, qydyryp kelemiz, taǵy eki qyz shyǵady» dep aldap, tysqa shyǵarǵan. Sóıtip, kólik júrgizgen jáne sóılesken jigitten basqa taǵy bir jigit bar, bári aýdan ortalyǵy Qordaıǵa barǵan. Jarty saǵattan asa belgisiz qyzdardy kútken olar dúkenge kirgen. Sol jerden jigitterdiń biri Kola sýsynyn alyp, kólikke kelip qyzǵa quıyp bergen. Sýsynnyń eki stakanyn ishken soń qyz esin joǵaltqan. Sol kezde jigitter jaman oıyn júzege asyrǵan.

Qordaı aýdandyq ishki ister bólimi men prokýratýra ókilderi jábirlenýshiden alynǵan taldamanyń nátıjesi daıyn bolmaı, kúdiktiler qamaqqa alynbaıtynyn aıtady. 

«Qyzdy es-tússiz kúıde belgisiz ýaqytta úıimizdiń aýlasyna ákelip tastaǵan. Men tańerteń qoqys tastaýǵa shyqqan sátte qyzymnyń es-tússiz jatqanyn, kıimderiniń bári búlingenin kórdim.

Tergeý barysynda «Qyzyńyz sizden uıalyp tur» dep meni tysqa shyǵaryp jiberip, qyzyma qysym jasaldy. Oqıǵa oryn alǵannan beri eshbir psıholog nemese basqa da mamandar kómektespedi. Mektep ákimshiliginen de qaıyrylǵan eshbir adam bolmady. Men bul is osylaı jyly jabylyp qala ma dep qorqamyn. Sol sebepti Prezıdentke, Bas Prokýratýra men sotqa úndeý jasadym. Qyzymnyń ómirin tas-talqan etkender tıisti jazasyn alýlary kerek», – deıdi qyzdyń anasy. 

Qazirgi tańda bul is áleýmettik jelide de keńinen talqylanyp, Májilis depýtattarynyń da nazaryn aýdardy. 

«Jambyl oblysy ákimdiginiń bilim basqarmasy Qordaı aýdany bilim bóliminiń Q.Sátpaev atyndaǵy orta mektebiniń oqýshysyna qatysty jasalǵan zorlyq-zombylyq faktisi boıynsha quzyrly organdar tarapynan saraptama taǵaıyndalyp, sotqa deıingi tergep-tekserý amaldary júrgizilýde. Qazaqstan Respýblıkasynyń Qylmystyq-protsestik Kodeksiniń 201-babyna sáıkes jábirlenýshi kámelet jasqa tolmaǵanǵa qatysty derekter jarııa etilmeıdi», – delingen Qordaı aýdandyq bilim bólimi taratqan resmı aqparatta. 

Al aýdan ákiminiń baspasóz qyzmeti qazirgi ýaqytta jasóspirimmen aýdandyq aýrýhananyń psıhologtary jumys istep jatqanyn, kúdiktilerdiń ústinen qylmystyq is qozǵalǵanyn málimdedi.

Buǵan deıin Jambyl oblysynda sarbaz jansaqtaý bólimine túskenin jazǵan bolatynbyz.