Jambyl oblysynda boıjetken TikTok arqyly tanysqan jigitke 1,4 mln teńge qaryzǵa bergen

TARAZ. KAZINFORM –   Jas jigit jańa tanysynan birneshe ret kómek suraǵan, biraq iri kólemde aqsha alǵannan keıin izim-qaıym joǵalyp ketken, dep jazdy Kazinform agenttiginiń tilshisi Jambyl aýdandyq sotynyń baspasóz qyzmetine silteme jasap.

Azamattyq ister ádette kópshiliktiń nazarynan tys qalady. Degenmen, Jambyl oblysynyń turǵyny – áleýmettik jeli arqyly tanysqan jigitke senip, qomaqty qarajat bergen qyzdyń oqıǵasy shekten tys senimniń nege aparatynyn kórsetti.

Tanysý osy jyldyń maýsym aıynda «TikTok»-ta bastalǵan. Jas jigit qyzben tez til tabysyp, túrli qıyndyqtaryn aıtyp, birneshe ret aqsha suraǵan. Sońynda Túrkııaǵa ota jasaý úshin shuǵyl túrde 1,4 mıllıon teńgeden astam qarajat qajet ekenin aıtqan. Qyz oǵan kómektesý úshin ózi qaryzǵa batyp, bul somany jınap bergen. Jigit aqshany oralǵan soń qaıtaratynyn, operatsııadan keıin birden habarlasatynyn ýáde etken. Alaıda ýáde oryndalmaǵan – jigit habarsyz ketken.

Jigitti taýyp, baılanys ornatý úshin qyz sotqa júginip, 1,4 mln teńge qaryzdy jáne 1 mln teńge moraldyq shyǵyndy óndirý týraly talap aryz bergen. Alaıda is tolyq sot talqylaýyna jetpeı aıaqtalǵan – taraptar medıatsııalyq kelisimge kelgen. Kelisim boıynsha, jaýapker bereshekti tolyq óteýge mindettelse, talapker qosymsha talaptardan bas tartqan. Alaıda burynǵy qarym-qatynas pen senim qalpyna kelmeıtini anyq.

Sot bul kelisimdi bekitip, isti toqtatty.

Buǵan deıin biz Tarazda dropper 2 mln teńgeden astam qarajatty qaıtarýǵa mindettelgeni jáne Jambyl oblysynda stomatologııada atys uıymdastyrǵan er adam sottalǵany týraly habarlaǵan edik.

Sondaı-aq Tarazda turǵyn úıdi jóndeýge bólingen 59 mln teńgeni jymqyrǵany habarlanǵan edi.