Jambyl oblysynda beınekameralardyń kómegimen 52 qylmys ashyldy
ASTANA. KAZINFORM — Jyl basynan beri Jedel basqarý ortalyǵynyń operatorlary 19,5 myńǵa jýyq ákimshilik quqyqbuzýshylyqty tirkedi. Olardyń basym bóligin jol qozǵalysy erejesin buzǵan júrgizýshiler jasaǵan.
Óńir kósheleri men joldaryndaǵy jaǵdaı Jedel basqarý ortalyǵynda táýlik boıy baqylanady. Beınekameralar bolǵan oqıǵanyń mán-jaıyn qalpyna keltirýge ǵana emes, quqyqbuzýshylyqty sol sátte anyqtap, oqıǵa ornyna jaqyn mańdaǵy polıtsııa jasaǵyn jedel jiberýge múmkindik beredi.
Polıtsııa departamentiniń málimetinshe, jyl basynan beri beınebaqylaý júıesiniń kómegimen 52 qylmys ashylǵan. Osy kezeńde operatorlar 19 460 ákimshilik quqyq buzýshylyqty tirkegen.
Olardyń 19 205-i jol qozǵalysy erejesin buzýǵa qatysty. Kóbine qaýipsizdik beldigin taqpaǵan júrgizýshiler men jolaýshylar, kólik tizgininde telefon qoldanǵan azamattar, sondaı-aq kóligin toqtatý jáne turaqqa qoıý qaǵıdalaryn buzǵan júrgizýshiler jaýapqa tartylǵan.
Beınekameralar qoǵamdyq oryndardy da baqylaıdy. Olardyń kómegimen usaq buzaqylyqtyń 156 deregi jáne qoǵamdyq oryndarda ishimdik ishken nemese mas kúıinde júrgen 36 jaǵdaıdyń joly kesilgen.
Aıta keteıik, aımaqta probatsııa talaptaryn buzǵan eki azamat túzeý mekemesine jiberildi.
