Jambyl oblysynda bes balanyń anasy jeti jyl boıy alıment tólemegen

TARAZ. KAZINFORM – Onyń bereshegi 2018 jyldan bastap 1,4 mln teńge bolǵan. Bul týraly Jambyl oblysy prokýratýrasynyń baspasóz qyzmeti habarlady.

— Shý aýdany prokýratýrasynyń bastamasymen polıtsııa bólimi bes balanyń anasy alıment tóleý jónindegi mindettemelerin oryndamaý faktisi boıynsha QK 139-babymen sotqa deıingi tergep-tekserýdi bastaǵan, 2018 jyldan bastap 1,4 mln teńge bereshek jınaqtalǵan, — delingen habarlamada.

Sotqa deıingi tergep-tekserý barysynda onyń alıment tóleýge múmkindigi bolǵandyǵy, alaıda tóleý úshin qajetti sharalar qoldanbaǵany anyqtaldy.

Sondaı-aq, boryshkerdiń menshiginde úıi jáne jeke qosalqy sharýashylyq júrgizý úshin jer telimi bar ekeni anyqtaldy.

— 25 aqpanda taraptardyń ózara kelisimi boıynsha atalǵan úı alıment bereshegin óteý esebine berildi. Qol jetkizilgen medıatıvtik kelisimge sáıkes boryshker alımentti turaqty túrde tóleýge mindettendi. 11 naýryzda taraptardyń tatýlasýyna baılanysty sotqa deıingi tergep-tekserý toqtatyldy, bul aqtalatyn negiz bolyp tabylmaıdy, — delingen prokýratýra habarlamasynda.

Qabyldanǵan sharalar profılaktıkalyq áser etti jáne alıment boıynsha bereshektiń tolyq ótelýin qamtamasyz etýge múmkindik berdi.

Aıta ketelik Qyzylordada 250 áıel balasyna alıment tóleýden jaltarǵan.