Jambyl oblysynda balanyń asqazanynan 12 santımetrlik «qoqys» alyndy
TARAZ. KAZINFORM – Kishkentaı naýqasty tekserý kezinde onyń asqazanynan kólemi 12 santımetrge deıin jetetin ózdiginen túzilgen tyǵyz zat anyqtaldy. Balaǵa ota jasalyp, qazir jaǵdaıy jaqsy. Ol aýrýhanadan shyǵaryldy, dep habarlaıdy Kazinform tilshisi.
Otaǵa Jambyl oblystyq kópbeıindi balalar aýrýhanasynyń mamandary qatysty. Dárigerler tekserý barysynda balanyń asqazanynda bezoar – aǵza qalypty túrde qoryta almaıtyn zattardyń tyǵyz shoǵyrlanýy paıda bolǵanyn anyqtady.
Mundaı túzilister balalarda salystyrmaly túrde sırek kezdesedi. Onyń paıda bolýyna ósimdik talshyqtary, tuqymdar men azyq-túlik qabyqtary, sondaı-aq jutylyp ketken shash, jip jáne basqa da bógde zattar sebep bolýy múmkin.
Bul kishkentaı naýqasta túzilistiń kólemi aıtarlyqtaı bolǵan. Onyń uzyndyǵy shamamen 10–12 santımetrge, al eni 7–9 santımetrge jetken.
Ýaqytyly júrgizilgen dıagnostıka asqynýlar paıda bolǵanǵa deıin balaǵa qajetti medıtsınalyq kómek kórsetýge múmkindik berdi. Bezoar hırýrgııalyq jolmen tolyǵymen alyndy.
Otadan keıin naýqas mamandardyń baqylaýynda boldy. Onyń jaǵdaıy tez turaqtandy. Qazir emdeý kýrsy aıaqtalyp, bala ózin jaqsy sezinedi jáne úıine shyǵaryldy.
Dárigerler kishkentaı balalardyń jeýge jaramsyz zattardy baıqamaı jutyp qoıýy múmkin ekenin eskertedi. Ata-analarǵa balanyń densaýlyǵyndaǵy ózgeristerge nazar aýdarý usynylady. Іshtiń aýyrýy, tábettiń tómendeýi, júrek aınýy nemese qusý baıqalsa, medıtsınalyq kómekke júgingen jón.
Eske sala keteıik, buǵan deıin Almatyda balanyń isheginen 59 magnıt alynǵan edi.
Sondaı-aq Almatyda bala abaısyzda jutyp qoıǵan úsh magnıt asqazan men ishekti jalǵap jibergenin jazdyq.
