Jambyl oblysynda azamattyq talap-aryzdar sany bir jylda 28 paıyzǵa artty
TARAZ. KAZINFORM - Jambyl oblysynyń sottarynda azamattyq ister sany kúrt ósti. Alaıda talaptardyń edáýir bóligi mindetti rásimder saqtalmaǵandyqtan ótinish ıelerine keri qaıtarylyp otyr, dep habarlaıdy Kazinform agenttiginiń tilshisi.
2025 jyldyń 12 aıynda Jambyl oblysy sottaryna esepti kezeń basyndaǵy qaldyqty qosa alǵanda 35 394 azamattyq talap-aryz túsken. Bul 2024 jylmen salystyrǵanda 7 772 iske, ıaǵnı 28,1 paıyzǵa kóp.
Júktemeniń artýymen birge keri qaıtarylǵan talap-aryzdar sany da kóbeıgen. 2025 jyly sottar 8 904 talapty keri qaıtarýǵa májbúr bolǵan, bul túsken isterdiń jalpy sanynyń 25,1 paıyzyn quraıdy. Taǵy 466 talapty qabyldaýdan bas tartylǵan. Aıta keterligi, talaptardyń keri qaıtarylýynyń jıi sebebi — daýdy sotqa deıin retteý tártibiniń saqtalmaýy. Bul negiz barlyq qaıtarylǵan aryzdardyń shamamen 40 paıyzyna sebep bolǵan.
Esepti kezeńde apellıatsııalyq tártippen 82 azamattyq is boıynsha sot sheshimderiniń kúshi joıyldy. Mundaı jaǵdaılarǵa azamattyq ister jónindegi sot alqasy turaqty túrde taldaý júrgizip, onyń nátıjelerin qalalyq jáne aýdandyq sottarǵa joldap otyrady.
Boryshkerlerdiń elden shyǵýyna shekteý qoıý máselelerine de aıryqsha nazar aýdarylyp otyr. Bir jyl ishinde oblys sottaryna ýaqytsha shekteýdi toqtata turý týraly 62 qaýly túsken, onyń 16-sy sottar tarapynan sanktsııalanǵan. Sot oryndaýshylarynyń osyndaı sheshimderi erekshe baqylaýda ekeni aıtylady.
Sonymen qatar sottarda bitimgershilik rásimderiniń róli artyp kele jatqany baıqalady. 2025 jyly medıatsııa tártibimen qaralýǵa jatatyn ister boıynsha 21 483 talap-aryz túsken. Onyń ishinde 6 932 is tatýlastyrý rásimderin qoldaný arqyly sheshilgen, bul olardyń jalpy sanynyń 43,4 paıyzyn quraıdy.
Osyǵan deıin Jambyl oblysynda nekege turý kórsetkishi ajyrasýdan alty ese joǵary ekeni týraly jazdyq.