Jambyl oblysynda áıgili qara kempirdiń mýzeıi ashyldy
TARAZ. KAZINFORM – Jambyl oblysynyń Merki aýdanyna qarasty Qyzylsaı aýylynda el ishinde «Qara kempir» atanǵan Qalı ananyń jurty jańǵyrtylyp, «Qalı apa mýzeı-úıi» retinde saltanatty túrde el ıgiligine berildi, dep habarlaıdy Jambyl oblysy ákimdiginiń baspasóz qyzmeti.
Taǵylymy mol shara Qalı ananyń ómirinen syr shertetin sahnalyq kórinispen bastalyp, kópshilikke erekshe áser syılady.
Saltanatty jıynǵa aýdan ákimi Erbol Jıenqulov, Merki óńiriniń týmasy, Qazaqstannyń halyq ártisi Altynbek Qorazbaev, akter ári rejısser, Qazaqstannyń halyq ártisi Tuńǵyshbaı Jamanqulov, oblystyq mádenıet basqarmasynyń basshysy Erlan Júnisbaı jáne sot salasynyń ardageri Musabek Álimbekov qatysty.
Sonymen qatar QR Eńbek sińirgen qaıratkeri, zerger-restavrator Berik Álibaev, Qyrǵyz Respýblıkasynan arnaıy kelgen delegatsııa jáne aýyl turǵyndary da sharanyń kýási boldy.
Jıynda Erlan Júnisbaı men Erbol Jıenqulov Qara kempir eskertkishiniń ornatylýyna bastamashy bolǵan Altynbek Qorazbaev pen mýzeıdi qalpyna keltirip, jańǵyrtýǵa úles qosqan Berik Álibaev eńbegin erekshe atap ótti.
Aýdan basshysy atalǵan azamattarǵa «Merki aýdanyna sińirgen eńbegi úshin» belgisin tabystap, qurmet kórsetti. Sondaı-aq Qyrǵyz elinen kelgen delegatsııany bastap kelgen Baqtııar Ashakeev, Altynbek Qorazbaev, Tuńǵyshbaı Jamanqulov jáne Musabek Álimbekov sóz sóılep, sharanyń rýhanı mańyzyna toqtaldy.⠀
Aýyl turǵyndary da ıgi iske uıytqy bolǵan azamattarǵa alǵys bildirdi. ⠀
Shara sońynda qatysýshylar mýzeı aýlasyndaǵy Ekinshi dúnıejúzili soǵys eskertkishine gúl shoqtaryn qoıyp, jańartylǵan mýzeı ekspozıtsııasymen tanysty.
