Jambyl oblysynda aýyl turǵyndaryna jańa sport kesheni ashyldy
TARAZ. KAZINFORM — Jambyl oblysynyń Nurlykent aýylynda jańa sport kesheni ashyldy. Endi aýyl turǵyndary zamanaýı zalda sportpen turaqty aınalysa alady. Nysan «Aýyl — el besigi» baǵdarlamasy aıasynda salynǵan. Jalpy oblysta sport ınfraqurylymyn damytý jumystary jalǵasyp jatyr. Bul týraly Úkimettiń baspasóz qyzmeti málim etti.
Memleket basshysy Qasym-Jomart Toqaevtyń azamattardyń ómir súrý sapasyn arttyrý jónindegi tapsyrmalaryn oryndaý sheńberinde Úkimet aýyldyq eldi mekenderde áleýmettik ınfraqurylymdy jańǵyrtý boıynsha keshendi jumys júrgizip jatyr.
Jambyl oblysy Nurlykent aýylynda jańa sport kesheniniń ashylýy ótti. Nysan «Aýyl — el besigi» baǵdarlamasy boıynsha salynǵan jáne aýyl turǵyndarǵa bos ýaqytyn paıdaly ótkizý úshin zamanaýı jaǵdaılar jasaýǵa baǵyttalǵan.
Sport kesheni jergilikti turǵyndardyń turaqty sportpen shuǵyldanýyna múmkindik beredi. Ǵımaratta ámbebap sport zaly, ózge de qosalqy úı-jaılar bar. Jambyl oblysynda barlyǵy 2465 sport nysany jumys isteıdi.
— Ótken jyly óńirde 10 keshen iske qosyldy, bıyl taǵy 12 keshenniń qurylysyn aıaqtaý josparlanýda. Sonymen qatar, Tarazda quny 6,4 mlrd teńge bolatyn ınklıýzıvti sport ortalyǵynyń qurylysy bastaldy, ol 2027 jyly paıdalanýǵa beriledi, sondaı-aq 3,5 mlrd teńgege fýtbol akademııasynyń qurylysyn salý josparlanǵan. Jalpy halyqtyń sporttyq ınfraqurylymmen qamtamasyz etilýi 2023 jylǵy 52,2%-dan 2025 jyly 59,6%-ǵa deıin ósti. Sonymen birge halyqty dene shynyqtyrý jáne sportpen shuǵyldanýǵa tartý da artty, — delingen habarlamada.
Eki jyl ishinde dene shynyqtyrýmen jáne sportpen júıeli túrde aınalysatyn halyqtyń úlesi 40,4%-dan 44,5%-ǵa deıin ósti. Balalar arasynda buqaralyq sportpen 34% nemese 1,8 mln adam aınalysady. Olardyń 228 myńnan astamy jan basyna shaqqandaǵy qarjylandyrý tetiginiń arqasynda 7 myń sport sektsııasyna tegin qatysady. BJSM-de taǵy 400 myńǵa jýyq bala sportpen shuǵyldana alady.
Aıta keteıik, Aqtóbedegi jańa sý qubyryna qaıtarylǵan aktıvter esebinen 5 mlrd teńge bólindi.
