Jambyl oblysynda aýdan ákiminiń mindetin atqarýshy para alǵany úshin sottaldy

TARAZ. KAZINFORM – Jambyl oblysynda Moıynqum aýdany ákiminiń mindetin ýaqytsha atqarýshy jemqorlyq jasaǵany úshin sottaldy.

Jambyl oblysy Moıynqum aýdandyq soty para alǵany úshin aýdan ákiminiń mindetin ýaqytsha atqarýshy S. Tólegenovke, atalǵan aýdannyń qarjy bóliminiń basshysy T. Ádilbaevqa jáne jeke kompanııa ókili A. Shubaevqa qatysty úkim shyǵardy.

«S. Tólegenov para alǵany, al T. Ádilbaev memlekettik satyp alý salasyndaǵy jumys jónindegi fýnktsııalardy laýazymdyq mindetterinen alyp tastamaǵany jáne qyzmet boıynsha jalpy qamqorlyǵy úshin S. Tólegenovke 400 myń teńge kóleminde para bergeni úshin kináli dep tanyldy. Budan bólek, T. Ádilbaev Moıynqum aýylynyń joldaryn jóndeý boıynsha oryndalǵan jumystarǵa jedel aqy tólegeni úshin A. Shubaevtan 600 myń teńge somasynda para alǵan. Sot úkimimen S. Tólegenov pen A. Shubaevqa 12 mln teńgeden, T. Ádilbaevqa 26 mln teńge aıyppul salyndy. Úkim zańdy kúshine engen joq. QR Qylmystyq Kodeksiniń 41-babyna sáıkes, aıyppul belgilengen merzimde tólenbegen jaǵdaıda jaza bas bostandyǵynan aıyrýǵa aýystyrylady», – delingen QR Sybaılas jemqorlyqqa qarsy is-qımyl agenttiginiń Jambyl oblysy boıynsha departamenti baspasóz qyzmeti taratqan aqparatta.

Aıta keteıik, buǵan deıin Jambyl oblysynda altyn urlaýmen jáne zańsyz óndirýmen aınalysqan qylmystyq top ustalǵanyn jazǵan bolatynbyz.