Jambyl oblysynda aýa raıyna baılanysty 700-ge jýyq avtokólik jınalyp qaldy
TARAZ. KAZINFORM — Jambyl oblysynda polıtseıler boranda qalǵan júrgizýshilerdi qutqarýǵa járdemdesti. Bul týraly Polisia.kz jazdy.
— Qatty boranǵa baılanysty Batys Eýropa — Batys Qytaı halyqaralyq trassasynyń 238–160 shaqyrymdary (jańa Qordaı asýy), sondaı-aq 213–160 shaqyrymdary (eski Qordaı asýy) barlyq kólik túrleri úshin áli de jabyq. Qordaı aýdanyndaǵy joldarda shamamen 700-ge jýyq avtokólik jınalyp qalǵan. Buǵan qosa, aýa raıynyń kúrt nasharlaýyna baılanysty Batys Eýropa — Batys Qytaı jolynyń 214 shaqyrymynan bastap (Merke aýylynan Qordaı baǵytyna) júk kólikteriniń qozǵalysyna ýaqytsha shekteý qoıyldy, — delingen habarlamada.
Al Túrkistan oblysy baǵytyndaǵy jol barlyq kólikke ashyq. Polıtseıler kúsheıtilgen rejımde qyzmet atqaryp, jolda qalǵan júrgizýshiler men jolaýshylarǵa qajetti kómek kórsetilip jatyr.
Patrýldik ekıpajdar joldyń jabylýy týraly túsindirip, kólikterdi qaýipsiz aımaqtarǵa baǵyttap, kolonnalardy eldi mekender men jylytý beketterine deıin ilesip jetkizip otyr. Sonymen qatar polıtsııa qyzmetkerleri qatty aıaz kezinde dızel otyny qatyp qalǵan reıstik avtobýstyń júrgizýshisi men jolaýshylaryna da kómek kórsetti. Jolaýshylardyń qaýipsizdigi qamtamasyz etilip, olar úılerine aman-esen jetkizildi.
Avtobýs arnaıy tehnıkamen qaýipsiz jerge súıretilip shyǵaryldy. Degenmen boran men nóldik kóriný jaǵdaıynda engizilgen resmı shekteýlerge qaramastan, óz ómirin qaterge tigetin júrgizýshiler áli de bar. Mundaı jaýapsyz áreketter tótenshe jaǵdaıǵa alyp kelip, jedel qyzmetterdiń kómegin qajet etedi.
— Aýa raıynyń qolaısyzdyǵyna baılanysty qozǵalysqa engizilgen ýaqytsha shekteýler jónindegi aqparat aldyn ala SMS-habarlama, messendjerler jáne áleýmettik jeliler arqyly taratylǵan. Alaıda keıbir azamattar eskertýlerdi elemeı, jolyn jalǵastyrýǵa tyrysqan, — dep jazdy Polıtsııa departamentinen.
Sol jaǵdaılardyń biri — KamAZ júk kóliginiń júrgizýshisine qatysty. Ol polıtsııa beketin aınalyp ótpek bolyp, ruqsat etilmegen baǵytpen jolsyzǵa túsken. Alaıda boran men kóktaıǵaq saldarynan aýyr tehnıka qarǵa batyp qaldy. Polıtseıler dereý jetip, arnaıy tehnıka kómegimen kólikti shyǵaryp, júrgizýshige qaýipsizdik talaptaryn saqtaý qajettigin túsindirdi.
Taǵy bir oqıǵa Qordaı aýdanynda tirkeldi. Mal baǵyp júrgen jergilikti shopan boranda baǵytynan jańylyp, úıine orala almaı qalǵan. Polıtsııa dereý izdestirý-qutqarý jumystaryn uıymdastyryp, shopandy qysqa ýaqytta taýyp, qaýipsiz jerge jetkizdi. Onyń ómirine eshqandaı qaýip tónip turǵan joq. Árbir osyndaı jaǵdaı — jolda berilgen eskertýler men qaýipsizdik talaptaryn elemeýdiń saldary qandaı bolatynyn aıqyn kórsetedi.
Polıtsııa qyzmetkerleri táýlik boıy jol qaýipsizdigin qamtamasyz etip, azamattardy qozǵalysqa engizilgen shekteýler men joldardyń jabylýy týraly aqparatty qatań eskerýge, beketterdi aınalyp ótpeýge, ruqsat etilmegen baǵyttarmen júrýden bas tartýǵa shaqyrady. Eń bastysy — ózińizdiń, jolaýshylardyń jáne ózgelerdiń ómirine qaýip tóndirmeý.
Eske sala keteıik, aýa raıyna baılanysty Jambyl jáne Túrkistan oblysynda kólik qozǵalysy shektelgenin jazǵan edik.
