Jambyl oblysynda ataýy joq aýyl bar
TARAZ. KAZINFORM – Jambyl oblysynyń Baızaq aýdanynda ataýy joq aýyl bar. Aýyl statýsy joq bolǵandyqtan, bıyl da bul jaqqa jergilikti bıýdjetten esh qarjy qaralmaǵan.
Esepke alynbaǵan eldi mekende qazirgi tańda 500-ge jýyq turǵyn bar. Biraq olarǵa qyzmet kórsetetin eshqandaı áleýmettik nysan joq. Sanda bar bolǵanymen, sanatta joq turǵyndar sharýasyn sheshý úshin biraz basshynyń esigin qaqqan. Biraq, nátıje joq.
«Bilýimizshe, ákimdikte biz qujat boıynsha «Densaýlyq saıajaıy» dep tirkelip turmyz. Biraq, statýs joq bolǵandyqtan, munda ne balabaqsha, ne mektep joq. Balalarymyz avtobýspen Aımantóbe aýylyna qatynap oqıdy. Balabaqshaǵa da solaı tasýǵa májbúrmiz. Keıbireýler Taraz qalasyna tasyp amaldaýǵa májbúr», – deıdi aýyl turǵyny Madına Qundyzbaeva.
Taǵy bir aýyl turǵyny Marat Kóshkinbaevtyń aıtýynsha, saıajaıda eki jyldan beri kóshe jaryǵy joq. Úsh jyldan beri sý kelmeıdi. Jergilikti bılik tarapynan da esh qoldaý joq. Kóshe joldaryn da aýyl turǵyndary ózderi jóndeıtin kórinedi.
Atalǵan másele boıynsha biz Baızaq aýdany ákimdigine habarlastyq. Aýdan ákiminiń baspasóz hatshysy Muhtar Manekev:
«1982 jyly Jambyl oblysy Baızaq aýdanynyń (burynǵy Sverdlov) aýmaǵynda halyq depýtattary atqarý komıtetiniń sheshimi boıynsha Jambyl oblystyq densaýlyq saqtaý bólimine jer paıdalaný josparyna sáıkes, shekarada 10 gektar jer bólinip, ony paıdalaný quqyǵyna arnalǵan memlekettik aktiler jazbasynyń 38 kitabyna tirkelgen. Atqarý komıtetiniń sheshimimen QK №007581 jerdi paıdalaný quqyǵyna memlekettik akt berilip, 1982 jylǵy 17 qarashada ádilet organdarynda №105 nómirmen tirkelgen.
Osy jer ýchaskesiniń negizinde Jambyl oblystyq densaýlyq saqtaý bólimi 1998 jyly 22 mamyrda «Densaýlyq» ujymdyq baý-baqsha seriktestigin qurǵan. Talas ózenine arnalǵan sý qorǵaý aımaqtary men beldeýlerin belgileýdiń bekitilgen jobalaryna sáıkes, 500 metr mólsherinde sý obektilerine irgeles sý qorǵaý aımaqtary men beldeýleri ornatylǵan.
Sondaı-aq, QR 2003 jylǵy 9 shildedegi №481 Sý Kodeksiniń 125-babyna sáıkes, 500 metr qorǵaý aımaǵynda ornalasýyna baılanysty eldi meken statýsy berilmeıdi dep kórsetilgen», – dedi.
Baspasóz hatshysynyń bergen málimetine súıensek, búginde Dıhan aýyldyq okrýgine qarasty Densaýlyq saıajaıynda 145 aýlada 487 adam qonystanǵan. Mektep jasyndaǵy 102 oqýshy kórshiles Aımantóbe aýylyndaǵy Berikqara mektebinde bilim alady. Saıajaıdyń ortalyq kóshesine túngi jaryqtar ornatylǵan. Baǵbandyq oryn retinde ýaqytsha paıdalanýǵa berilgen jer bolýyna baılanysty eldi meken mártebesin berý qarastyrylmaǵan.
Saıajaı kóshelerine sońǵy ret 2015 jyly shaǵal tas tóselipti. Alaıda, 2016 jyly Talas ózeni arnasynan tasyp, saıajaıdyń basym bóligin sý basyp qalǵan. Sol ýaqytta aýyr tehnıkalar júrip, jol jamylǵysyn búldirgen. 2017 jyly demeýshiler esebinen shaǵal tas jamylǵysy súrilip, tegistelgen.
«Saıajaı bolǵandyqtan ári sý basyp qalý qaýpine baılanysty munda asfalt jamylǵysyn salý josparlanbaǵan. Saıajaı turǵyndary kúndelikti ómir súrýine qajetti gaz qubyrymen jáne elektr jelisimen tolyqtaı qamtylǵan.
Sondaı-aq 2017 jyly saıajaı turǵyndaryna Aımantóbe aýylynda beriletin jer kezegine turýǵa usynys berilgen. Osy maqsatta 2020 jyly Aımantóbe aýylynda ınjenerlik ınfraqurylymdy damytý boıynsha 43 jer ýchaskesi ázirlenip, turǵyndarǵa jeke turǵyn úılerin soǵýǵa berilgen.
Búgingi kúnge úı qurylysy salynbaǵan 32 jer ýchaskesi memleketke qaıtaryldy», – dedi Muhtar Manekeev.
Aıta keteıik, buǵan deıin Jambyl oblysynda Rysqul Jylqyaıdarulynyń qabiri qorǵaýǵa alynbaı turǵanyn jazǵan bolatynbyz.
