Jambyl oblysynda ata-anasyna alıment tóleýge qatysty 20 is qaralyp jatyr
ASTANA. KAZINFORM – Jambyl oblysynda kámeletke tolǵan balalardan ata-anasynyń paıdasyna alıment óndirýge qatysty 20 atqarýshylyq is oryndalý satysynda tur.
Alıment óndirý daýlary árdaıym kámeletke tolmaǵan balalardy asyraýmen baılanysty bola bermeıdi. Keı jaǵdaıda talap qoıýshy retinde qart nemese eńbekke jaramsyz ata-analar shyǵyp, kámeletke tolǵan ul-qyzdarynan materıaldyq kómek óndirýdi talap etedi.
Oblystyq Ádilet departamentiniń málimetinshe, óńirde ata-analardyń óz balalarynan alıment óndirip alýǵa qatysty 20 atqarýshylyq is qaralyp jatyr.
Budan bólek, tórt atqarýshylyq qujat ata men ájeniń alıment tóleýine qatysty. Mundaı jaǵdaıda, eger balanyń ata-anasynan alıment óndirý múmkin bolmasa, ony ózge jaqyn týystardan óndirip alý zańmen qarastyrylǵan.
Sonymen birge, vedomstvo otbasylyq daýlardyń mán-jaıyn, taǵaıyndalǵan alıment mólsherin jáne talap qoıýǵa negiz bolǵan sebepterdi jarııalamady.
Osyǵan deıin Jambyl oblysynda alıment tólemegen turǵynnyń bas bostandyǵy shektelgeni týraly jazdyq.
