Jambyl oblysynda ashtan ólgen esekter isi boıynsha fermerge aıyppul salyndy
ASTANA. KAZINFORM – Jambyl oblysynda esekterdiń ashtan qyrylýy faktisinen keıin jergilikti fermerge birneshe aıyppul salyndy. Aıyppuldar maldy kútip-baǵý jáne sáıkestendirý erejelerin buzý, veterınarııalyq-sanıtarııalyq normalardy saqtamaý jáne esep júrgizý úshin qajetti málimetterdi usynbaý derekteri boıynsha salynǵan.
AShM Veterınarııalyq baqylaý jáne qadaǵalaý komıteti oblystyq aýmaqtyq ınspektsııasynyń málimetinshe, «Aýyl sharýashylyǵy janýarlaryn sáıkestendirý» aqparattyq júıesinde esekterdiń ıesi retinde Jamash Turlybek tirkelgen. Onyń ıeliginde 2 443 bas esek bar.
Buǵan deıin de veterınarııalyq talaptardy buzǵany úshin ákimshilik jaýapkershilikke tartylǵan kásipker taǵy da tekseris nátıjesinde aıyppulǵa ilikti. Maldy kútip-baǵý jáne sáıkestendirý erejelerin buzǵany úshin oǵan 98 300 teńge, al kelesi kúni veterınarııalyq-sanıtarııalyq normalardy saqtamaý jáne esep úshin derekterdi bermeý faktileri boıynsha taǵy da 98 300 teńge aıyppul salyndy.
Sonymen qatar Temirbek aýyldyq okrýginiń veterınarlyq dárigerinen janýarlardy sáıkestendirý jumystaryn der kezinde uıymdastyrmaǵany úshin túsinikteme alyndy. 24 qazanda oǵan da Ákimshilik quqyq buzýshylyq týraly kodekstiń 406-babynyń 5-tarmaǵy boıynsha 49 150 teńge kóleminde aıyppul salynǵan.
Mamandardyń málimetinshe, Temirbek aýyldyq okrýgi aýmaǵynda sońǵy úsh jylda janýarlardyń asa qaýipti aýrýlary tirkelmegen. 2025 jylǵa arnalǵan veterınarııalyq-profılaktıkalyq is-sharalar bekitilgen josparǵa saı júrgizilip jatyr. Ótken aptada alynǵan zerthanalyq synamalardyń nátıjeleri ázirge daıyn emes.
Buǵan deıin jergilikti turǵyndar birneshe aı boıy okrýg aýmaǵyndaǵy esekterdi basqa jerge kóshirýdi talap etken bolatyn. Baızaq aýdany ákimdigi bul másele sheshile bastaǵanyn habarlady.
«25 qazan, senbi kúni Temirbek aýyldyq okrýgi mańynda ustalǵan esekter Moıynqum aýdanynyń Ulanbel aýyly jaqtaǵy jaıylymdarǵa aıdala bastady. Qazir qoralarda uzaq qashyqtyqqa shydaı almaıtyn 10-15 bas qana janýar qaldy», – dep naqtylady ákimdik ókilderi.
Sonymen birge Temirbek aýyldyq okrýginiń ákimdigine aýmaqtyń sanıtarııalyq jaǵdaıyn tekserip, tıisti aktini usyný tapsyryldy.
Aıta keteıik, Jambyl oblysynda mal aýrýlarynyń 10 deregi anyqtaldy.
