Jambyl oblysynda áriptesiniń úıin eki ret tonaǵan áıel sottaldy
TARAZ. KAZINFORM — Jambyl oblysynyń turǵyny áriptesiniń kilt jasyrǵan jerin estip, onyń úıinen eki márte altyn áshekeılerin urlap ketken.
Oqıǵa 2025 jyldyń qyrkúıeginde Jambyl aýdanyndaǵy mektepterdiń birinde bastalǵan. Muǵalimge aǵasy kelip, úıiniń kiltin suraǵan. Áıel kilttiń qaı jerge jasyrylǵanyn aıtyp beredi. Bul áńgimeni áriptesi kezdeısoq estip qalady.
Birneshe kúnnen keıin úı ıesiniń keshke deıin jumysta bolatynyn bilgen áriptesi syltaý aıtyp jumys ornynan shyǵyp ketedi. Ol jasyrylǵan kiltti taýyp, áriptesiniń úıine kirip, altyn alqa men saqınany urlap ketken.
Alǵashqy urlyq kezinde odan eshkim eshkim kúmándanbaǵan. Osyny paıdalanǵan áıel araǵa birneshe kún salyp álgi úıge taǵy kelip, sol tásilmen ishke kirip, altyn alqa men bilezikti alyp ketken.
Alaıda kóp uzamaı ol ustalyp, sotqa tartyldy. Áıelge ózgeniń úıine zańsyz kirip, birneshe ret urlyq jasaǵan degen aıyp taǵyldy. Onyń kinási jábirlenýshi men kýágerlerdiń aıǵaqtarymen dáleldendi.
Prokýror sottan oǵan 3 jyl 6 aı merzimge bas bostandyǵynan aıyrý jazasyn taǵaıyndaýdy surady. Sottalýshy óz kinásin tolyq moıyndap, jasaǵan isine ókinetinin aıtyp, aıyptaýmen kelisti.
Jábirlenýshi sotta keltirilgen materıaldyq shyǵyn tolyq ótelgenin jáne burynǵy áriptesine eshqandaı talaby joq ekenin málimdedi.
Sot aıyptalýshynyń kinásin moıyndaýy, ókinýi jáne onyń kámeletke tolmaǵan balalary bar ekenin eskerdi. Nátıjesinde áıel kináli dep tanylyp, 3 jylǵa bas bostandyǵynan aıyryldy. Alaıda onyń qyzy 14 jasqa tolǵanǵa deıin jaza óteý merzimi 3 jylǵa keıinge shegerildi.
Aıta keteıik, Almatyda 50-ge jýyq urlyq jasaǵan alty qylmystyq top ustaldy.
