Jambyl oblysynda arqar men qaraquıryq sany kóbeıdi

TARAZ. KAZINFORM – 2025 jyldyń qorytyndysy boıynsha Jambyl oblysynda jekelegen jabaıy janýarlar túriniń sany turaqty ósim kórsetken.

Júrgizilgen esep nátıjesine sáıkes, óńir aýmaǵynda 699 arqar tirkelgen. Bul 2024 jylmen salystyrǵanda 33%-ǵa kóp. Ótken jyly olardyń sany 584 bolǵan.

Sondaı-aq kıikter tuqymdasyna jatatyn qaraquıryq sany 1014 basqa jetip, bir jyl ishinde 10%-ǵa artqan.

Jalpy esep boıynsha oblysta 300 myńǵa jýyq jabaıy janýar mekendeıdi. Onyń ishinde tuıaqty janýarlar – 2264 bas, terisi baǵaly ańdar – 16 435, qustar – 68 450, al sý qustary – 200 698.

Inspektsııa málimetinshe, janýarlar sanynyń artýy tabıǵatty qorǵaý jáne bıotehnıkalyq is-sharalardyń nátıjesi. Atap aıtqanda, qys mezgilinde janýarlardy turaqty túrde qosymsha azyqtandyrý jumystary júrgizilgen. 2025 jyldyń qarasha-jeltoqsan aılarynda bul sharalar júıeli túrde uıymdastyrylyp, janýarlardyń qyrylý deregi tirkelmegen.

Qazirgi tańda Jambyl oblysy aýmaǵynda Qazaqstannyń Qyzyl kitabyna engen 20-dan astam janýar túri mekendeıdi. Qaraquıryq pen arqar boıynsha jyl saıyn jeke sanaq júrgiziledi.

Sonymen qatar popýlıatsııanyń jaǵdaıyn baqylaý jalǵasýda. 2025 jyldyń sáýir jáne qarasha aılarynda Bıologııalyq qaýipsizdik problemalary ǵylymı-zertteý ınstıtýtynyń ǵalymdarymen birlesip, Baızaq, Merki jáne T. Rysqulov aýdandarynda jabaıy janýarlar arasynda juqpaly aýrýlardyń bar-joǵyna zertteý júrgizilgen. Taldaý nátıjesinde qaýipti ınfektsııalar anyqtalmaǵan.

Buǵan deıin Jambyl oblysynda 3,8 mln mal qystap jatqanyn habarlaǵan edik.