Jambyl oblysynda alty jasar bala josparly em qabyldaý kezinde qaıtys boldy

ASTANA.KAZINFORM - Qaıǵyly oqıǵa T.Rysqulova aýdanyndaǵy ortalyq aýdandyq aýrýhanada boldy. Týystary bala óliminiń sebebin áli bilmeımiz jáne onyń medıtsınalyq kartasyn ala almaımyz dep otyr, dep habarlaıdy Kazinform tilshisi.

Balanyń naǵashysy vıdeohabarlama jarııalap, onda aýrýhana basshylyǵy oqıǵanyń mán-jaıyn túsindirmeı, eshqandaı qujat bermeı jatqanyn aıtqan.

Týystarynyń aıtýynsha, balaǵa dıskınezııa — qozǵalys belsendiliginiń buzylýy nemese ishki aǵzalardyń, ásirese ót shyǵarý joldary motorıkasynyń buzylýy dıagnozy qoıylǵan. Olardyń aıtýynsha, emdeý sımptomdardy jeńildetetin, biraq onyń negizgi sebebin joımaıtyn kómekshi «Kreon» preparatymen shektelgen.

Oblystyq densaýlyq saqtaý basqarmasy qyzmettik tekseris júrip jatqanyn, balanyń denesi sot-medıtsınalyq saraptamaǵa jiberilgenin habarlady.

— Alty jasar bala men onyń ájesi aýrýhanaǵa jatqyzý portaly arqyly josparly túrde jatqyzyldy. 2025 jyldyń 7 qazanynan bastap klınıkalyq hattamaǵa sáıkes tekserýler men emdeý júrgizildi. Balanyń jaǵdaıy ortasha aýyrlyqta boldy. 2025 jyldyń 10 qazanynda tańǵy saǵat 6:55-te bala kenetten qaıtys boldy. Qazir ólimniń sebebin anyqtaý jumystary júrgizilip jatyr. Vedomstvonyń resmı málimdemesine sáıkes, tolyq aqparat saraptama qorytyndysy alynǵannan keıin beriledi, - delingen habarlamada.

Medıtsınalyq mekeme oqıǵa týraly jergilikti polıtsııa bólimine habarlaǵan. Alaıda qylmystyq is qozǵaldy ma, joq pa belgisiz. Polıtsııa departamenti jaǵdaıǵa qatysty túsinik bermeı otyr.

Otbasy beıtarap tergeýdi talap etip otyr. Olardyń aıtýynsha, balanyń anasy eki jyl buryn dál osy aýrýhanada qaıtys bolǵan. Endi otbasy qaıǵyly oqıǵanyń mán-jaıyn anyqtap, kinálilerdi jaýapqa tartýdy surap otyr.

Jaqynda Qostanaı oblysynda naýqas ota kezinde qaıtys bolyp, qylmystyq is qozǵaldy.