Jambyl oblysynda alkogol satqan dúken ıesine 3 mln teńge aıyppul salyndy
TARAZ.KAZINFORM – Qoǵamdyq tártipti nyǵaıtý jáne salaýatty ómir saltyn nasıhattaý maqsatynda Jambyl oblysynyń Baızaq aýdanynda «Alkogolsiz aýyl» bastamasy iske asyrylyp jatyr.
Atap aıtqanda, aýdan prokýratýrasynyń úılestirýimen, sondaı-aq aqsaqaldar men jergilikti turǵyndardyń qoldaýymen Abaı, Bazarbaı jáne Baızaq aýyldarynda alkogoldik ishimdikterdi satý tolyǵymen toqtatyldy.
Sonymen qatar alkogol aınalymy salasyndaǵy zańnamanyń saqtalýyna baqylaý kúsheıtildi. Zańnama talaptaryn buzǵany úshin ÁQBtK-niń 200-babymen 25 adam ákimshilik jaýapqa tartyldy.
Máselen, Baızaq aýdandyq sotynyń 2026 jylǵy 26 aqpandaǵy qaýlysymen iri sýpermarketterdiń biri táýliktiń tyıym salynǵan ýaqytynda alkogoldik ónimderdi satqany úshin kináli dep tanylyp, ÁQbK-niń 200-baby boıynsha 432 myń teńge mólsherinde aıyppul salyp, lıtsenzııasynyń qoldanylýyn bir aı merzimge toqtata otyryp, ákimshilik jaýapqa tartyldy.
Alaıda engizilgen shekteýlerge qaramastan, reıdtik is-sharalar barysynda lıtsenzııa toqtatylǵan kezeńde alkogoldik ónimderdi saqtaý faktisi anyqtaldy.
Prokýrorlyq qadaǵalaý aktisi boıynsha kásiporyn ÁQBtK-niń 282-babynyń 1-bóliginiń 7) tarmaǵy boıynsha kináli dep tanylyp, lıtsenzııadan aıyra otyryp, 3 mln teńgeden astam mólsherde aıyppul túrinde ákimshilik jazaǵa tartyldy.
Qabyldanǵan sharalar mas kúıinde jasalǵan qylmystar sanynyń 73,4%-ǵa tómendeýine yqpal etti.
Prokýratýra azamattardy alkogoldik ónimderdiń aınalymy salasyndaǵy zańnamanyń talaptaryn múltiksiz saqtaýǵa shaqyrady.
Aıta keteıik, Jambyl oblysynda 56 aýyldyń turǵyndary alkogolsiz ómir saltyna kóshti. Bul bastama óńirdegi turmystyq zorlyq-zombylyq pen qylmys deńgeıin azaıtýǵa baǵyttalǵan.
Abaı oblysynda ishimdikten bas tartqan aýyldar sany 30-ǵa jetti.
