Jambyl oblysynda alıment tólemegen turǵynnyń bas bostandyǵy shekteldi
ASTANA. KAZINFORM – Jambyl oblysynda alıment óndirýge qatysty eń kúrdeli atqarýshylyq is júrgizýler boıynsha bereshek kólemi 319 mln teńgege jetti.
Oblystyq Ádilet departamentiniń málimetinshe, óńirde alıment úsh aıdan astam ýaqyt tólenbegen 232 problemalyq is tirkelgen.
Bıylǵy jyldyń alǵashqy alty aıynda boryshkerlerdi ákimshilik jaýapkershilikke tartý týraly 192 usynys joldanǵan. Onyń nátıjesinde almıment tólemeı júrgen 172 adamǵa ákimshilik jaza qoldanyldy.
Sonymen qatar 67 materıal qylmystyq jaýapkershilik máselesin qaraý úshin quqyq qorǵaý organdaryna jiberildi. Sotqa deıingi tergep-tekserýlerdiń biryńǵaı tizilimine 13 is tirkelip, onyń ekeýi sotqa joldanǵan. Sonyń biri boıynsha alıment tólemegen azamat bir jylǵa bas bostandyǵyn shekteý jazasyna kesildi.
Sondaı-aq 182 boryshkerdiń Qazaqstannan shyǵýyna ýaqytsha tyıym salyndy. Budan bólek, kólik quralyn basqarý quqyǵyn ýaqytsha toqtatý týraly 33 usynys sotqa joldandy.
Bereshekti óndirý barysynda múliktik sharalar da qoldanylyp jatyr. Sonyń biri boıynsha quny 8,6 mln teńgeden asatyn jyljymaıtyn múlik óndirip alýshynyń menshigine berilip, qaryz ótelgen.
Osyǵan deıin Shymkentte alıment tólemegen 31 adam qylmystyq jaýapqa tartylǵany týraly jazdyq.
