Jambyl oblysynda ákimshilik daýlardyń úshten biri sot oryndaýshylaryna qatysty
ASTANA. KAZINFORM — Jambyl oblysynda ákimshilik sottarǵa túsken árbir úshinshi talap-aryz sot sheshimderiniń oryndalýyn qamtamasyz etýge mindetti sot oryndaýshylarynyń áreketine qatysty bolǵan.
Jyldyń alǵashqy 6 aıynda óńirdiń ákimshilik sottaryna barlyǵy 657 ótinish túsken. Onyń 28,9 paıyzy sot oryndaýshylaryna qatysty shaǵymdarǵa tıesili. Odan keıingi orynda jer daýlary — 12,6 paıyz, ózge daýlar — 12,3 paıyz, memlekettik satyp alýǵa qatysty máseleler — 11,1 paıyz jáne turǵyn úı daýlary — 7 paıyz.
Alaıda talap-aryzdyń berilýi sottyń isti mindetti túrde qaraıtynyn bildirmeıdi. Esepti kezeńde 346 talap-aryz qaıtarylǵan. Onyń 184 jaǵdaıynda talap-aryzdy qaıtarýdy ótinish berýshilerdiń ózderi suraǵan. Taǵy 92 ótinish ákimshilik sot isin júrgizý tártibimen qaralýǵa jatpaǵan.
Qalǵan sebepterdiń basym bóligi protsestik sıpatta bolǵan. On segiz talap qoıýshy mindetti sotqa deıingi tártipten ótpegen. On adam isti qaraýǵa quzyreti joq sotqa júgingen. Al 19 adam belgilengen merzimdi ótkizip alyp, ony qalpyna keltire almaǵan.
Sonymen qatar 13 talap-aryzǵa talap qoıýshynyń atynan ókildik etýge quqyǵy joq adamdar qol qoıǵan. Taǵy eki jaǵdaıda memlekettik baj tolyq kólemde tólenbegen.
Aıta keteıik, Batys Qazaqstan oblysynda jeke sot oryndaýshyǵa qatysty qylmystyq is qozǵaldy.
