Jambyl oblysynda abattandyrý erejesin buzýdyń 20 myńnan astam deregi anyqtaldy
ASTANA. KAZINFORM – Jambyl oblysynda jyl basynan beri abattandyrý qaǵıdalaryn buzýdyń 20 708 deregi tirkeldi. Olardyń qatarynda eldi mekenderdi abattandyrý talaptaryn saqtamaý, ınfraqurylym nysandary men jasyl jelekterdi búldirý jaǵdaılary bar, dep habarlaıdy oblystyq polıtsııa departamenti.
Departament málimetine súıensek, qoǵamdyq oryndardy lastaýdyń 854 deregi jeke tirkelgen.
Aldyn alý jumystary aıasynda 19 917 azamatqa eskertý jasaldy. Polıtsııa qyzmetkerleri tekserý júrgizip, turǵyndarǵa qoǵamdyq keńistikterdi kútip ustaý talaptaryn túsindirip jatyr.
Eske sala keteıik, buǵan deıin Jambyl oblysynda jyl basynan beri 82 vandalızm dereginiń joly kesilgeni habarlanǵan edi.
Sondaı-aq Shyǵys Qazaqstan oblysynda zańsyz qoqys úıindilerine tıisti baqylaý júrgizbegeni úshin aýyldyq okrýgterdiń 12 ákimi jaýapqa tartyldy.