Jambyl oblysynda 930 bala arnaıy medıtsınalyq tekseristen ótpegen — Prokýratýra
TARAZ. KAZINFORM — Jambyl oblysynda prokýrorlar kámeletke tolmaǵandardy medıtsınalyq tekserýden ótkizý kezinde quqyq buzýshylyqtar bolǵanyn anyqtady. Bul týraly óńirlik prokýratýra málimdedi.
Jýaly aýdanynyń prokýratýrasy mindetti áleýmettik medıtsınalyq saqtandyrý salasyndaǵy zańdylyqtyń jaı-kúıine júrgizgen taldaý barysynda medıtsınalyq mekemelerdiń balalarǵa profılaktıkalyq medıtsınalyq tekserýler uıymdastyrmaǵanyn anyqtady.
— Jýaly aýdanynyń 7 bilim berý uıymynda 930 kámeletke tolmaǵan bala arnaıy medıtsınalyq tekserýden ótpegen, bul olardyń kepildendirilgen medıtsınalyq kómek alý quqyǵyn buzyp otyr, — delingen habarlamada.
Prokýrorlyq qadaǵalaý aktisiniń negizinde balalar tekserýden óte bastady, al kináli tulǵalar tártiptik jaýapkershilikke tartyldy.
Prokýratýra balalardyń quqyqtaryn qorǵaý boıynsha jumysyn jalǵastyrady.
Buǵan deıin habarlanǵandaı, Jambyl oblysynda 300-den astam adamdy aldaǵan alaıaqtar anyqtaldy.