Jambyl oblysynda 89 kanalda qurylys jáne rekonstrýktsııa jumystary júrip jatyr
ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov Jambyl oblysynyń turǵyndarymen eseptik kezdesý ótkizip, óńirde vedomstvonyń atqaryp jatqan jumystary jóninde baıandady.
Mınıstrliktiń baspasóz qyzmeti habarlaǵandaı, byltyrdyń qorytyndysy boıynsha Shý aýdanyndaǵy Oń jaǵalaý magıstraldyq kanalynyń ırrıgatsııa jáne drenaj júıelerin qalpyna keltirý jumystary aıaqtaldy. Nátıjesinde 5 172 gektar jerdi sýaratyn tozyǵy jetken ırrıgatsııa jáne drenaj júıeleri qalpyna keltirildi.
Halyqaralyq qarjy uıymdarynyń qoldaýymen Shý, Baızaq, Talas jáne Sarysý aýdandarynda jalpy uzyndyǵy shamamen 1000 shaqyrymdy quraıtyn 89 kanalda jumystar júrgizilip jatyr. Bul nysandar oblystaǵy 100 myń gektardan astam sýarmaly jerdi sýmen qamtamasyz etedi.
Sonymen qatar 74-ten astam kanaldy rekonstrýktsııalaýǵa arnalǵan jobalaý qujat ázirlenip jatyr. Bir jańa sý qoımasyn salý jáne bir qoldanyp jatqan sý qoımasyn rekonstrýktsııalaý jobalaryn iske asyrý bastaldy.
Sheteldik ınvestorlardy tartý baǵytynda da belsendi jumystar júrgizilip jatyr. Máselen, Taraz qalasynda Qytaı tehnologııasy boıynsha beton tósemderin óndirý iske qosyldy. Kásiporynnyń óndiristik qýaty jylyna shamamen 900 myń sharshy metrdi quraıdy, bul óńirdiń qajettiligin qamtamasyz etýge múmkindik beredi.
Sondaı-aq Jambyl oblysynda tamshylatyp sýarý júıelerin shyǵarý boıynsha Qazaqstan-Qytaı birlesken jobasy júzege asyrylyp jatyr. Búginde kásiporynnyń óndiristik qýaty 14 myń gektar aýmaqty tamshylatyp sýarý taspalarymen qamtýǵa múmkindik berdi.
— Sýǵa turaqty qoljetimdilikti qamtamasyz etý, sýarý júıelerin qalpyna keltirý jáne fermerlerdi qoldaý — óńirdegi ómir súrý jaǵdaıyn jaqsartýǵa baǵyttalǵan ózara baılanysty sharalar. Bizdiń mindetimiz — sý resýrstaryn utymdy ári uqypty paıdalanýdy qamtamasyz etý, sýdyń jol-jónekeı ysyrap bolmaýyna jáne onyń shynymen qajet jerlerge — egistik alqaptary men turǵyndardyń úılerine ýaqytyly jetýine qol jetkizý. Infraqurylymdy jańǵyrtyp, zamanaýı tehnologııalardy engizip qana qoımaı, sý resýrstaryn jaýapkershilikpen paıdalaný mádenıetin qalyptastyrý da mańyzdy. Tek osylaı ǵana biz sý resýrstaryn bolashaq urpaq úshin saqtap qala alamyz, — dedi Sý resýrstary jáne ırrıgatsııa mınıstri Nurjan Nurjigitov.
Eseptik kezdesýde Jambyl oblysynyń turǵyndary bógetter men kanaldardy jóndeý, sondaı-aq óńirde júrgizilip jatqan qurylys-montaj jumystarynyń sapaly oryndalýyna qatysty suraqtar qoıdy.
Odan keıin mınıstr azamattardy jeke qabyldap, Sarysý jáne Sozaq aýdandaryna ekologııalyq maqsattaǵy sý jiberý, «Bóribaı» kanalyn tazalaý jáne sý únemdeý sýarý tehnologııalaryn engizý úshin elektr energııasyn sýbsıdııalaý máseleleri jónindegi suraqtarǵa jaýap berdi.
Buǵan deıin Jambyl oblysynda 263 shaqyrym kanal jóndeletinin jazǵanbyz.
