Jambyl oblysynda 8,5 mln teńgeniń malyn urlaǵan kúdikti ustaldy
ASTANA. KAZINFORM — Jambyl oblysynyń Qordaı aýdanynda 8,5 mıllıon teńgeden astam shyǵyn keltirgen mal urlyǵy ashyldy.
Qordaı aýdandyq polıtsııa bólimine jergilikti turǵyn aryzben júgindi. Onyń aıtýynsha, maldy jazǵy jaıylymǵa aıdar aldynda basyn sanaý kezinde 51 qoı men 27 qozynyń joq ekeni anyqtalǵan. Keltirilgen materıaldyq shyǵyn 8,5 mıllıon teńgeden asty.
Aryz ıesiniń aıtýynsha, ol joǵalǵan maldy óz kúshimen izdep kórgenimen, izdestirý jumystary nátıje bermegen. Osydan keıin polıtsııadan kómek suraǵan.
Bul derek boıynsha mal urlaý faktisimen sotqa deıingi tergep-tekserý bastaldy. Jedel-izdestirý is-sharalary barysynda krımınaldyq polıtsııa qyzmetkerleri kúdiktiniń jeke basyn anyqtap, ony ustady. Qabyldanǵan jedel sharalardyń nátıjesinde urlanǵan maldyń bir bóligi zańdy ıesine qaıtaryldy.
Polıtsııa aýyl sharýashylyǵy janýarlarynyń ıelerine mal ustaıtyn oryndardyń senimdi kúzetilýin qamtamasyz etýdi, syrǵalaý jáne janýarlardy sáıkestendirýdiń ózge de quraldaryn qoldanýdy, sondaı-aq maldyń joǵalý faktileri anyqtalǵan jaǵdaıda dereý polıtsııaǵa habarlaýdy eskertedi.
Eske salaıyq, buǵan deıin Qazaqstanda bıyl alǵashqy bes aıda mal urlaýmen aınalysqan 58 top ustalǵanyn habarlaǵanbyz.
