Jambyl oblysynda 800 mlrd teńgelik alyp zaýyt salynyp jatyr
ASTANA. KAZINFORM - Aýyl sharýashylyǵy vıtse-mınıstri Ermek Kenjehanuly Jambyl oblysyna jumys sapary barysynda AÓK salasyndaǵy ınvestıtsııalyq jobalardyń iske asyrylýymen tanysty.
«Alel Agro» AQ saǵatyna 9 myń bas qus soıatyn et óńdeý zaýytynyń qurylysyn júrgizip jatyr. Jobanyń jalpy quny – 18,5 mlrd teńge. Kásiporyn tolyq qýatyna shyqqannan keıin jylyna 70 myń tonna qus etin óndiretin bolady, 500 jańa jumys orny ashylady.
Budan keıin vıtse-mınıstr «TRZ Agro» JShS-niń syıymdylyǵy 12 myń tonnalyq kókónis saqtaý qoımasynyń qurylys barysyn kórdi. Jalpy quny 1,3 mlrd teńgeni quraıtyn joba SQO tájirıbesin taratý baǵdarlamasy aıasynda qarjylandyrylyp jatyr. Nysandy iske qosý 2026 jylǵa josparlanǵan.
Jambyl aýdany Eńbek aýylynda «AzNur AGRO» AÓK 400 basqa arnalǵan tsıfrlyq sút-taýarly fermasynyń qurylysyn júrgizilip jatyr. Jobanyń quny – 1,8 mlrd teńge. Qarjylandyrý SQO tájirıbesin taratý baǵdarlamasy aıasynda qarastyrylǵan. Qarajat qurylys jumystaryna, jabdyqtar satyp alýǵa jáne Danııa men Reseıden asyl tuqymdy ІQM ákelýge baǵyttalǵan. Fermanyń qýaty jylyna 3 600 tonna sút óndirýge múmkindik beredi.
Baızaq aýdanynda Ermek Kenjehanuly «Aspan» agroholdıngi» AÓK-niń 1 000 gektar alqaptaǵy kóktemgi egis jumystarynyń barysymen jáne tamshylatyp sýarý júıelerin engizý jumystarymen tanysty. Joba SQO tájirıbesi aıasynda 700 mln teńge kóleminde qarjylandyrylǵan. Qazirgi ýaqytta 15 uńǵyma tolyq qazylyp, 56 shaqyrym jerasty sý qubyrlary tartylǵan. Alańda 200 gektar qant qyzylshasy men 500 gektar dándik júgeri egildi.
Sapar sońynda vıtse-mınıstr «Fufeng Group» kompanııasynyń júgerini tereń óńdeý boıynsha óndiristik kesheniniń qurylys alańyna bardy. Jobanyń jalpy quny – 800 mlrd teńge. Zaýyt valın, taǵamdyq glıýtamın, taǵamdyq leıtsın, tsıtrýllın jáne treonın óndiretin bolady. Óndirilgen ónim QHR men Eýropa elderine eksporttalady dep josparlanyp otyr.
Qazirgi tańda alańda ákimshilik ǵımarattar, jataqhana, ashana, alty shıkizat qoımasy, JEO, táýligine 6 myń tonna aýyl sharýashylyǵy ónimin keptirýge arnalǵan keptirý kesheni, sondaı-aq tórt fermentatsııalyq tsehtyń qurylysy aıaqtalǵan.
Birinshi kezeńniń jabdyqtary tolyq jetkizilip, ornatylǵan. Nysanda 1 200-den astam jumysshy eńbek etýde.
Sapar qorytyndysy boıynsha Ermek Kenjehanuly aýqymdy agrojobalardy ýaqytyly iske qosýdyń el ekonomıkasy úshin strategııalyq mańyzyn atap ótip, jumys qarqynyn tómendetpeýdi jáne aýyl sharýashylyǵy taýaryn óndirýshilerge jan-jaqty qoldaý kórsetýdi tapsyrdy.
Osyǵan deıin Qaraǵandy oblysynda quny 42,5 mlrd teńge bolatyn farmatsevtıkalyq zaýyt salynatyny týraly jazdyq.
