Jambyl oblysynda 76 kanaldy rekonstrýktsııalaý jáne 3 sý qoımasynyń qurylysy bastalady

ASTANA. KAZINFORM - Sý resýrstary jáne ırrıgatsııa mınıstrligi bıyl Jambyl oblysynda jalpy uzyndyǵy 428 shaqyrym bolatyn 76 sýarý kanalyn rekonstrýktsııalaý jumysyn bastaýdy josparlap otyr.

Mınıstrliktiń baspasóz qyzmetiniń habarlaýynsha, budan bólek, Qalǵuty, Aqmola jáne Yrǵaıty sý qoımalarynyń qurylysy bastalady. Sondaı-aq, Teris-Aşybulaq jáne Qaraqonyz sý qoımalaryn rekonstrýktsııalaý qarastyrylǵan.

Qordaı, Jambyl, Baızaq, Merki jáne Jýaly aýdandarynda 53,9 gektar jerge sý berý sapasyn jaqsartý úshin 34 joba iske asyrylyp jatyr. Búgingi tańda 12 joba aıaqtaldy. Byltyr jalpy uzyndyǵy 137,5 shaqyrym bolatyn 37 kanalda qurylys jumystary aıaqtaldy. 46 tik drenajdy uńǵyma burǵylanyp, 12 – si qalpyna keltirildi.

- Mınıstrlik aldaǵy eki jylda Jambyl oblysynda 19 jobany aıaqtaýdy josparlap otyr. Atap aıtqanda, jalpy uzyndyǵy 330 shaqyrym bolatyn 105 kanalǵa rekonstrýktsııa jasalady. Bul tasymaldaý kezinde sý shyǵynyn azaıtady jáne óńirdegi egis alqaptaryn sýarmaly sýmen qamtamasyz etý sapasyn jaqsartady, - dedi Sý resýrstary jáne ırrıgatsııa mınıstri Erbolat Ibraıhanov.

Osyǵan deıin elimizde sý sharýashylyǵy salasyn basqarý túbegeıli jańǵyrtylyp jatqany týraly jazdyq.