Jambyl oblysynda 56 aýyl ishimdikten bas tartty
ASTANA. KAZINFORM — Jambyl oblysynda 56 aýyldyń turǵyndary alkogolsiz ómir saltyna kóshti. Bul bastama óńirdegi turmystyq zorlyq-zombylyq pen qylmys deńgeıin azaıtýǵa baǵyttalǵan.
Jýyrda óńirde «Alkogolsiz aýyl» atty jedel-profılaktıkalyq is-shara aıaqtaldy. Onda polıtsııa qyzmetkerleri memlekettik organdardyń ókilderimen birge eldi mekenderge baryp, turǵyndarmen kezdesip, esepte turǵan azamattardy jáne saýda núktelerin tekserdi.
Polıtseılerdiń aıtýynsha, mundaı reıdterdiń maqsaty — tek quqyq buzýshylyqtardy anyqtaý emes, alkogol áserinen jıi týyndaıtyn turmystyq janjaldar men qaqtyǵystardyń aldyn alý.
Tórt kún ishinde profılaktıkalyq esepte turǵan 1676 adam turǵylyqty jeri boıynsha tekserildi. Olardyń ishinde 268 adam shartty túrde merziminen buryn bosatylǵan, 477 adam alkogoldi shamadan tys tutynatyndar qatarynda, sondaı-aq 173 qaýip tobyndaǵy otbasy bar.
Sonymen qatar polıtsııa zańsyz alkogol satý faktilerin tekserip, 13 buzýshylyqty anyqtady.
Jalpy reıd barysynda 167 ákimshilik quqyq buzýshylyqtyń joly kesildi. Onyń basym bóligi qoǵamdyq oryndardaǵy tártipke qatysty boldy: alkogol ishý nemese mas kúıde júrýdiń 145 jaǵdaıy tirkeldi.
Qazirgi ýaqytta Jambyl oblysynda 56 aýyl alkogolden bas tartqan. Bul tájirıbe ásirese Qordaı aýdany men Turar Rysqulov atyndaǵy aýdanda keń taralǵan. Quqyq qorǵaý organdary bul tájirıbeni búkil óńirde keńeıtýdi josparlap otyr.
Osyǵan deıin Qyzylordada ishimdiksiz aýyldar sany 47-ge jetkeni týraly habarladyq.
