Jambyl oblysynda 5 myń gektardan astam jer memleketke qaıtaryldy

ASTANA. KAZINFORM — Tekserý barysynda Merki aýdanynda ornalasqan jalpy aýdany 5,2 myń gektar bolatyn, jer telimderi nysanaly maqsatqa saı paıdalanylmaı otyrǵany anyqtaldy. Bul týraly AShM baspasóz qyzmeti habarlady. 

Óńirde aýyl sharýashylyǵy maqsatyndaǵy paıdalanylmaı jatqan jerlerdi memleket menshigine qaıtarý boıynsha sharalar qabyldandy.

Aýyl sharýashylyǵy mınıstrliginiń Jer resýrstaryn basqarý komıtetine qarasty Jambyl oblysynyń jer resýrstaryn basqarý departamenti aýyl sharýashylyǵy taýar óndirýshileriniń birine qatysty tekserý júrgizdi. 

Tekserý barysynda Merki aýdanynda ornalasqan jalpy aýdany 5,2 myń gektar bolatyn, jer telimderi nysanaly maqsatqa saı paıdalanylmaı otyrǵany anyqtaldy.

Tekserý nátıjesinde jer paıdalanýshyǵa anyqtalǵan zań buzýdy joıý týraly nusqama berildi. Alaıda belgilengen merzimde talaptar oryndalmaǵandyqtan, departament jer ýchaskelerin májbúrlep memleket menshigine qaıtarý týraly talap aryzben sotqa júgindi. 

Jambyl oblysynyń mamandandyrylǵan aýdanaralyq ekonomıkalyq soty paıdalanylmaı jatqan jerlerdi májbúrlep memleket menshigine qaıtarý týraly sheshim qabyldady.

Іs keıin Jambyl oblystyq sotynyń apellıatsııalyq alqasynda qaralyp, jaýapkerdiń shaǵymy qanaǵattandyrylmaı, birinshi satydaǵy sot sheshimi óz kúshinde qaldy.

Aıta ketelik Aqtaýda zańsyz jer basyp alý faktileri baqylaýǵa alyndy.