Jambyl oblysynda 438 keli qarasora ósirgen kúdikti ustaldy
ASTANA. KAZINFORM – Jambyl oblysynda arnaıy operatsııa barysynda 438 keli qarasora tárkilenip, esirtki ósirdi degen kúdikpen Taraz qalasynyń 40 jastaǵy turǵyny ustaldy, dep habarlaıdy Polisia.kz.
Arnaıy operatsııa «Qarasora – 2026» respýblıkalyq jedel-profılaktıkalyq is-sharasy aıasynda polıtsııa qyzmetkerleri men Ulttyq ulan áskerı qyzmetshileriniń qatysýymen júrgizilgen.
Óńirdiń qumdy alqapqa jaqyn aýmaǵynan avtonomdy elektr qýatymen jáne sýarý júıesimen jabdyqtalǵan jasyryn esirtki alqaby anyqtaldy. Onda úndi qarasorasy ósirilgen.
Jasyryn alqapty anyqtaý úshin áýe barlaýy júrgizilip, ushqyshsyz ushý apparattary paıdalanylǵan. Polıtsııa málimetinshe, jedel qyzmetkerlerdiń úılesimdi is-qımyly nátıjesinde kúdikti qylmys ústinde ustaldy. Ol – buryn birneshe ret sottalǵan Taraz qalasynyń 40 jastaǵy turǵyny.
– Kúdikti quramynda esirtki zattary bar ósimdikterdi óńdep, keıin olardy basqa óńirlerge aparyp, kóterme baǵamen satýdy kózdegen. Tintý barysynda jalpy salmaǵy 438 keli bolatyn, bıiktigi eki metrden asatyn 50 túp qarasora, qaptama materıaldary jáne arnaıy agrotehnıkalyq jabdyqtar tárkilendi, – delingen habarlamada.
Sonymen qatar jedel qyzmetkerler serııalyq nómiri óshirilgen, oq-dárileri bar Makarov tapanshasyn anyqtaǵan. Budan bólek, 12 kalıbrli «Baıkal» myltyǵy men onyń oq-dárileri, sondaı-aq esirtki tasymaldaýǵa paıdalanylǵan jol talǵamaıtyn kólik tárkilendi.
Kúdiktige qatysty QR Qylmystyq kodeksiniń 300 jáne 287-baptary boıynsha quramynda esirtki zaty bar ósimdikterdi ósirý jáne qarýdy zańsyz saqtaý faktileri boıynsha qylmystyq ister qozǵaldy.
Polıtsııa málimetinshe, kúdikti kinásin moıyndap, ýaqytsha ustaý ızolıatoryna qamaldy.
Qazirgi ýaqytta esirtkiniń zańsyz aınalymyna qatysy bolýy múmkin ózge de adamdardy anyqtaý boıynsha jedel is-sharalar jalǵasyp jatyr.
Aıta keteıik, Almaty áýejaıynda 32 keliden astam esirtki tárkilendi.
