Jambyl oblysynda 42 eldi meken sý basý qaýpi bar aımaqta ornalasqan
ASTANA. KAZINFORM — Sý tasqyny kezeńinde óńirdegi 12 sý qoımasy erekshe baqylaýǵa alynǵan, dep habarlaıdy Kazinform tilshisi.
Jambyl oblysynyń Tótenshe jaǵdaılar departamenti bastyǵynyń mindetin atqarýshy Bekzat Qambarovtyń aıtýynsha, qazirgi tańda qaýipti aımaqtarda qar jamylǵysy men topyraqtyń tońdanýy baıqalmaıdy. Bul mamandardyń jumysyn jeńildetkenimen, aýa raıynyń kúrt jylynýy, taýly aımaqtardaǵy muzdyqtardyń erýi jáne betkeılik aǵynnyń kúsheıýi alańdaýshylyq týdyryp otyr. Sonymen qatar, sınoptıkter sáýir aıynyń alǵashqy kúnderi mol jaýyn-shashyn túsetinin boljaǵan.
Jambyl oblysy ákimdiginiń málimetinshe, óńir basshysy Erbol Qarashókeev 4 sáýir kúni jappaı senbilik ótkizýdi tapsyrǵan. Onyń aıasynda aryqtar tazartylyp, avtojoldar boıyndaǵy kópirler men sý ótkizý nysandarynyń jaǵdaıy tekseriledi.
— Sý basý qaýpi bar eldi mekenderde arnaıy qorlar jasaqtalyp, mobıldi toptar qurylady. Sonymen qatar, bul aımaqtarda tótenshe jaǵdaı týyndaǵan jaǵdaıda paıdalanýǵa arnalǵan janar-jaǵarmaı, azyq-túlik jáne dári-dármek qory daıyndalyp jatyr, — delingen habarlamada.
Buǵan deıin Jambyl oblysynyń Talas aýdanynda 40 jyldan astam ýaqyt boıy tazartylmaǵan kanaldy qalpyna keltirý jumystary júrgizilip jatqanyn jazdyq.