Jambyl oblysynda 417 zańsyz qoqys úıindisi anyqtaldy
ASTANA. KAZINFORM – Jambyl oblysynda bıylǵy jyldyń alǵashqy alty aıynda eldi mekenderdiń tazalyǵy men abattandyrý qaǵıdalaryn buzýǵa qatysty 44 myńnan astam quqyqbuzýshylyq anyqtaldy.
Jyl basynan beri óńirde 44 123 ekologııalyq quqyqbuzýshylyq tirkelgen. Onyń ishinde 35 872 derek abattandyrý talaptary men kommýnaldyq qaldyqtardy basqarý qaǵıdalaryn saqtamaýǵa qatysty bolsa, 8 251 jaǵdaı ortaq paıdalanylatyn aýmaqtardy lastaýmen baılanysty.
Osyndaı zańbuzýshylyqtardyń saldarynan óńirde 417 zańsyz qoqys úıindisi anyqtalǵan. Mamandar olardy joıý jumystaryn júrgizip, kinálilerdi jaýapqa tartyp jatyr.
Reıd barysynda turǵyndarǵa turǵyn úıge irgeles aýmaqty jeke qoıma retinde paıdalanýǵa bolmaıtyny eskertildi. Atap aıtqanda, kómir, otyn, taqtaı, qurylys materıaldary, avtokólik shınalary men qosalqy bólshekterdi uzaq ýaqyt saqtaýǵa tyıym salynǵan.
Sondaı-aq japyraq, qýraǵan shóp, butaq, turmystyq jáne óndiristik qaldyqtardy órteýge bolmaıdy. Mundaı otty aýlalarda da, qoǵamdyq oryndarda da jaǵýǵa ruqsat etilmeıdi. Ortaq paıdalanylatyn aýmaqtarǵa shynjyr, bóget nemese avtoturaqqa arnalǵan qorshaýlardy óz betinshe ornatý da zańbuzýshylyq bolyp sanalady.
Zańsyz qoqys oryndary týraly aqparatty turǵyndardyń ózderi de jıi habarlaıdy. Áleýmettik jelilerdegi jarııalanymdar men basqa da baılanys arnalary arqyly túsken málimetter qoqys jınalǵan aýmaqtardy jedel anyqtap, tazalaý jumystaryn uıymdastyrýǵa jáne olardyń qaıta paıda bolýyna jol bermeýge múmkindik beredi.
Aıta keteıik, osyǵan deıin ShQO-da jyl basynan beri 130-ǵa jýyq zańsyz qoqys úıindisi anyqtalǵan bolatyn.
