Jambyl oblysynda 40 myńnan astam azamat baspana kezeginde tur

TARAZ. KAZINFORM – Jambyl oblysynda kommýnaldyq turǵyn úı kezeginde 40 174 azamat tirkelgen, olardyń 30 045-i – áleýmettik osal top ókilderi. Bul týraly qurylys basqarmasy basshysynyń orynbasary Dáýlet Daırabaev málim etti.

Derekke qaraǵanda, byltyr óńirde 759 myń sharshy metr turǵyn úı paıdalanýǵa berildi. Bul ótken jylmen salystyrǵanda 104,5%-ǵa artyq. bıyl bul kórsetkishti 765 myń sharshy metrge jetkizý kózdelip otyr. 

- Osy jyly áleýmettik turǵyn úı qurylysyna 36 mlrd teńge bólinip, 3 445 azamat baspanaly bolady.

Sonymen qatar 14,5 mlrd teńgege 2 190 páterlik 46 úıdiń qurylysy júrip jatyr. Jyl sońyna deıin sonyń 2 030 páterge arnalǵan 44-i aıaqtalady. Qazirdiń ózinde 420 páterlik 8 áleýmettik úı paıdalanýǵa berildi, - dedi spıker BAQ ókilderine.

Onyń sózine qaraǵanda, 2025 jyly áleýmettik osal toptarǵa arnalǵan 1 415 páterdi satyp alýǵa respýblıkalyq bıýdjetten 21,5 mlrd teńge bólindi.

Aıta keteıik, Jambyl oblysynda bıyl tutynýshylardan 742 ótinish tústi.