Jambyl oblysynda 4 adam mert bolǵan jol apatyna áıgili sportshynyń qatysy bar ma
ASTANA. KAZINFORM — Áleýmettik jelilerde jol apatyna jekpe-jek sheberi, bloger ári kóp balaly ana Saıa Áýelbekovanyń qatysy bolýy múmkin degen boljamdar aıtylyp jatyr, dep habarlaıdy Kazinform.
Qaıǵyly oqıǵa 20 qyrkúıek, jeksenbi kúni Merki aýdanynyń Qostoǵan aýylynda bolǵan. TANK 500 jol talǵamaıtyn kóligi men VAZ-2107 soqtyǵysqan. Apat saldarynan 4 adam kóz jumdy.
Alaıda, bul oqıǵa araǵa birneshe kún salyp jeli qoldanýshylary jol talǵamaıtyn kóliktiń júrgizýshisine qatysty boljamdar aıtqannan keıin ǵana qyzý talqyǵa tústi. Paıdalanýshylar bul apatty buryn arnaıy jedel áreket etý bólimshesinde arnaýly jasaqtyń ınspektory bolyp qyzmet etken Saıa Áýelbekovamen baılanystyryp otyr. Jelide ony keıde beıresmı «batyr ana» dep te ataıtyn.
Áýelbekova shynymen de kóp jyl boıy quqyq qorǵaý organdarynda jumys istegen jáne sporttyq is-sharalarda polıtsııanyń atynan qatysqan. Onyń jekpe-jek óneri, pankratıon jáne qol kúresi týrnırlerindegi jeńisteri de BAQ-ta jazylǵan. Degenmen, polıtsııa TANK 500 júrgizgen áıel quqyq qorǵaý organdarynyń qyzmetkeri emes ekenin málimdedi.
Al áleýmettik jelilerde apattyń mán-jaıyna qatysty dolbar kóbeıip keledi. Keıbir jazbalarda tipti jol talǵamaıtyn kólik soqtyǵysar aldynda saǵatyna 200 shaqyrymǵa deıingi jyldamdyqpen júrgen bolýy múmkin dep te aıtylyp júr.
Jambyl oblysynda qyzý talqylanyp jatqan taǵy bir másele — kameraǵa túsip qalýy múmkin kadrlar men basqa da aıǵaqtardyń saqtalýy. Sportshynyń ataǵy men polıtsııadaǵy burynǵy jumysy tergeýge áser etýi múmkin degen alańdaýshylyq týyndap otyr. Tipti «izin jasyryp jatyr» degen pikirler de bar.
Áýelbekanyń týystary da oqıǵaǵa qatysty óz nusqalaryn aıtty. Sportshynyń paraqshasynda ápkesi jazba jarııalap, Saıanyń aýyr apatqa ushyraǵanyn jáne onyń jaǵdaıy aýyr ekenin rastady. Onyń aıtýynsha, sportshy qarsy betten atyp shyqqan kólikten qashýǵa tyrysqan.
Alaıda polıtsııanyń resmı jaýabynda apattyń mán-jaıy basqasha sıpattalady.
Jambyl oblystyq polıtsııa departamentiniń málimetinshe, TANK 500 júrgizýshisi qarsy bettegi qozǵalys jolyna shyǵyp ketken, sonyń saldarynan VAZ-2107 kóligimen soqtyǵysqan. Kólik júrgizýshisi jáne jol talǵamaıtyn kóliktegi úsh jolaýshy mert bolǵan. TANK 500 kóligin tizgindegen áıel aýdandyq aýrýhanaǵa jatqyzylǵan.
Oqıǵaǵa baılanysty qylmystyq is qozǵaldy.
— Іs Jambyl oblystyq polıtsııa departamentine berildi. Qazirgi ýaqytta oqıǵanyń barlyq mán-jaıyn obektıvti túrde anyqtaý úshin tergeý amaldary júrip jatyr. Tergeýdi PD basshylyǵy baqylaýda. Tergep-tekserý nátıjeleri boıynsha qoldanystaǵy zańnamaǵa sáıkes tıisti protsessýaldyq sheshim qabyldanady, — dep habarlady polıtsııa.
Eske sala keteıik, Jambyl oblysynda burynǵy depýtat Baqytjan Bazarbektiń qatysýymen jol apaty bolyp, bir adam zardap shekken. Bazarbek oqıǵa týraly óz paraqshasynda pikir bildirdi.
Jıyrma tórt kúnnen keıin jábirlenýshiniń komadan shyqqany jáne keıin aýrýhanadan shyǵarylǵany týraly habarlandy.
Túrkistan oblysynda bolǵan jol apatynan eki adam kóz jumdy.
