Jambyl oblysynda 376 tonna jabaıy qarasora joıyldy
ASTANA. KAZINFORM – Jambyl oblysynyń Merki aýdanynda «Qarasora – 2026» jedel-profılaktıkalyq is-sharasy aıasynda 376 tonna jabaıy qarasora joıyldy, dep habarlaıdy prokýratýra.
Merki aýdany prokýratýrasynyń úılestirýimen ýákiletti memlekettik organdar 2026 jylǵy maýsymnan bastap aýdan aýmaǵynda jabaıy qarasorany anyqtaý jáne joıý boıynsha keshendi jumystar júrgizip jatyr.
Aýdan aýmaǵynda jabaıy qarasora ósetin jerlerdiń jalpy kólemi shamamen 19 myń gektardy quraıdy.
– Atalǵan jumystardy júrgizýge jumys tobynyń múshelerimen qatar 14 aýyldyq okrýgten 28 erikti tartylyp, qajetti arnaıy tehnıka jumyldyrylǵan. Búgingi kúnge 580 gektar aýmaqta 376 tonna jabaıy qarasora shabylyp, órteý arqyly joıyldy, – delingen prokýratýra habarlamasynda.
Vedomstvo málimetinshe, jabaıy qarasorany joıý jumystary aýdanda jyl saıyn júıeli túrde júrgiziledi. Bul esirtki quraldarynyń zańsyz aınalymynyń aldyn alýǵa baǵyttalǵan negizgi sharalardyń biri.
Júrgizilgen profılaktıkalyq jumystar aıasynda aýdanda esirtki qylmystarynyń sany da azaıǵan. 2025 jyldyń alǵashqy jeti aıynda 45 esirtki qylmysy tirkelse, bıyl osy kezeńde 28 derek tirkelgen. Osylaısha qylmys deńgeıi 37,8%-ǵa tómendedi.
Іs-sharalardyń negizgi maqsaty – esirtki qylmystarynyń aldyn alý, esirtki quraldarynyń zańsyz aınalymyna tosqaýyl qoıý, qoǵamdyq qaýipsizdikti qamtamasyz etý jáne óskeleń urpaqty esirtkiniń zııandy áserinen qorǵaý.
– Esirtki quraldaryn zańsyz ósirý, saqtaý, tasymaldaý, ótkizý jáne olardyń zańsyz aınalymyna baılanysty ózge de áreketter Qazaqstan Respýblıkasynyń zańnamasynda kózdelgen jaýaptylyqqa ákep soǵady, – dep eskertti Jambyl oblysynyń prokýratýrasy.
Aıta keteıik, Temirtaý mańynda jylyjaıda ósirilgen 125 túp qarasora anyqtaldy.
