Jambyl oblysynda 34 mln teńgeniń maly urlandy
ASTANA. KAZINFORM — Sońǵy 4 aıdyń ishinde Baızaq aýdanynyń aýyl turǵyndary 400-ge jýyq qoı-eshkisinen aıyrylǵan. Mal urlyǵyna qatysy bar degen kúdikpen 4 adam ustaldy.
Bıyl shilde men qazan aılary aralyǵynda Baızaq aýdanynyń aýyldarynda birneshe ret mal urlyǵy tirkeldi. Urylar maldy jaıylymnan da, qoradan da aıdap áketken.
Oblystyq Polıtsııa departamentiniń málimetinshe, barlyǵy 384 bas usaq mal urlanǵan. Keltirilgen shyǵyn kólemi — 34 mln teńge.
Krımınaldyq polıtsııa qyzmetkerleri 4 kúdiktini ustady. Qazir tergeý olardyń mal urlyǵynyń tórt deregine qatysy bar-joǵyn anyqtap jatyr. Іs boıynsha zattaı aıǵaqtar jınalyp, kýágerler men kúdiktilerden jaýap alynǵan.
Asa iri mólsherde birneshe ret mal urlaý deregi boıynsha sotqa deıingi tergeý bastaldy. Tórt kúdikti de ýaqytsha ustaý ızolıatoryna qamaldy. Qazir polıtsııa kúdiktilerdiń óńirdegi osyǵan uqsas ózge de mal urlyǵyna qatysy bar-joǵyn tekserip jatyr.
Eske sala keteıik, Abaı oblysynyń Besqaraǵaı aýdanynda mal urlyǵymen aınalysqan 11 adam ártúrli merzimge bas bostandyǵynan aıyryldy.
Jalpy jyl basynan beri Qazaqstanda mal urlyǵyna qatysty 460-qa jýyq kúdikti ustalyp, 3 myńnan astam mal zańdy ıelerine qaıtaryldy.
