Jambyl oblysynda 263 shaqyrym kanal jóndeledi
ASTANA. KAZINFORM — Jambyl oblysynyń Shý aýdanynda jalpy uzyndyǵy 263 shaqyrymnan asatyn 42 kanaldy rekonstrýktsııalaý jáne betondaý jumystary bastaldy.
Jambyl oblysyna jumys sapary aıasynda Sý resýrstary jáne ırrıgatsııa mınıstri Nurjan Nurjigitov Shý aýdanyndaǵy sý sharýashylyǵy ınfraqurylymyn damytý jobalarynyń iske asyrylý barysymen tanysty.
Qazirgi tańda aýdanda Islam damý bankiniń qoldaýymen júzege asyrylyp jatqan «Klımatqa tózimdi sý resýrstaryn damytý» jobasy aıasynda jalpy uzyndyǵy 263 shaqyrymnan asatyn 42 kanaldy jóndeý jáne rekonstrýktsııalaý jumystary bastaldy. Onyń ishinde eki magıstraldy kanaldy qosa alǵanda, 120 shaqyrym kanal tolyq betondalady.
Jumystarǵa alty merdiger uıym qatysyp jatyr. Sondaı-aq 100-den astam arnaıy tehnıka men 240-tan asa adam jumyldyrylǵan. Jobany iske asyrý aýdannyń 31 myń gektar sýarmaly jeriniń melıoratsııalyq jaǵdaıyn jaqsartyp, sý shyǵynyn azaıtýǵa múmkindik beredi. Barlyq qurylys-montaj jumysy 2027 jyldyń sońyna deıin tolyq aıaqtalady dep josparlanǵan.
Mınıstr «Masaq-Aqtóbe», «Estemes» jáne «Beımembet» kanaldaryndaǵy jumystarmen tanysty. Qazirgi ýaqytta kanaldardy betondaý jáne naýalardy ornatý jumystary júrgizilip jatyr.
Budan keıin mınıstr Sol jaǵalaý magıstraldy kanalyndaǵy jumystardyń barysymen tanysty. Onyń jalpy uzyndyǵy — 37,7 shaqyrym. Bul nysandy rekonstrýktsııalaý 9349 gektar sýarmaly jerge sý jetkizýdi jaqsartýǵa baǵyttalǵan. Qazirgi ýaqytta nysanda mehanıkalyq tazartý jumystary júrgizilip jatyr.
Odan soń Nurjan Nurjigitov jalpy uzyndyǵy 50 shaqyrymnan asatyn Oń jaǵalaý magıstraldy kanaly men «Birlik» jáne «Bolnıchnyı-1» kanaldaryn rekonstrýktsııalaý jumystarymen tanysty. Qazirgi tańda kanaldardy betondaý jáne jekelegen ýchaskelerdi qamystan tazartý jumystary júrgizilýde.
Jumys sapary Tasótkel magıstraldy kanalynda jalǵasty. Qazirgi ýaqytta nysan boıynda ornalasqan jalpy uzyndyǵy 18,7 shaqyrym bolatyn tórt kanalda naýalardy demontajdaý, betondaý jáne shópterden tazartý jumystary bastaldy.
Sonymen qatar mınıstr jalpy uzyndyǵy 86,5 shaqyrym bolatyn toǵyz kanaldy qum men shópterden mehanıkalyq tazartý jumystarynyń barysymen, sondaı-aq jalpy uzyndyǵy 20 shaqyrymnan asatyn jeti kanalda betondaý, temirbeton naýalaryn ornatý jáne gıdrotehnıkalyq nysandar salý jumystarymen tanysty.
Jalpy alǵanda Jambyl oblysynda «Klımatqa tózimdi sý resýrstaryn damytý» jobasy Baızaq, Merki, Sarysý, Talas jáne Shý aýdandarynda jalpy uzyndyǵy shamamen 400 shaqyrym bolatyn 71 kanaldy qaıta jańǵyrtýdy kózdeıdi.
Sý sharýashylyǵy nysandaryn tekserýdi aıaqtaǵannan keıin Nurjan Nurjigitov Shý aýdany ákimdiginde merdiger uıymdar ókilderimen ınfraqurylym jobalaryn sapaly júzege asyrý máseleleri boıynsha keńes ótkizdi.
— Júzege asyrylyp jatqan joba Shý aýdany men jalpy Jambyl oblysynyń agrarlyq sektorynyń bolashaǵy úshin asa mańyzdy. Atqarylyp jatqan jumystardyń sapasy mınıstrliktiń erekshe baqylaýynda. Barlyq jumys belgilengen merzimde aıaqtalýy tıis. Biz ınvestıtsııa tartý jáne sapaly saraptama júrgizý baǵytynda úlken jumys atqardyq, endi jobany tolyq aıaqtaý qajet, — dedi Sý resýrstary jáne ırrıgatsııa mınıstri Nurjan Nurjigitov.
Aıta ketelik qazaqstanda kanaldardy mehanıkalyq tazalaý kólemi úsh esege artty.
