Jambyl oblysynda 26 jastaǵy er adamnyń denesi tabyldy

ASTANA. KAZINFORM – Jambyl oblysynyń polıtseıleri áleýmettik jelide jas qyzdyń adam qolynan qaza tapqany týraly aqparatty joqqa shyǵardy. Tártip saqshylarynyń sózinshe, Jýaly aýdany Berikqara shatqalynda er adamdy óltirý deregi tirkelgen. 

Sońǵy kúnderi áleýmettik jelide uqsas eki jańalyq tarady. Bireýler Berikqara shatqalynda pyshaq jaraqatynan qaza tapqan er adam tabyldy dese, taǵy basqalary er adam mas kúıinde janjaldasyp, jas qyzdy óltirdi dep habarlady. Eki oqıǵada da zardap shekken adam men kúdikti bir demalys aımaǵynda jumys isteıtini aıtyldy.

Jambyl oblysynyń baspasóz qyzmeti 26 jastaǵy er adamnyń denesi tabylǵanyn rastady. Alaıda qyzdyń ólimi týraly aqparatty joqqa shyǵardy. Qazir osy derekke qatysty QR QK 99-baby boıynsha sotqa deıingi tergeý amaldary júrgizilip jatyr. 

Tártip saqshylary taratqan aqparatqa sáıkes, kúdikti ustaldy. Tıisti tergeý amaldary bastalyp ketti. Qylmystyq istiń mán-jaıy anyqtalatyn bolady.

Eske salsaq, budan buryn Pavlodarda jetim qyzdy zorlaǵan er adam polıtsııa qolyna túspeý úshin ózin atyp óltirgeni anyqtaldy.