Jambyl oblysynda 24 keliden astam esirtki tasymaldaǵandar ustaldy
TARAZ. KAZINFORM – Jambyl oblysynyń polıtsııa qyzmetkerleri Merki aýdanynyń qumdy aýmaǵynda «KIA» markaly avtokóliginen 24 kg 160 gr esirtki tárkiledi.
28 jastaǵy kólik júrgizýshisi qumdy aımaqtan Taraz qalasyna qaraı bara jatqan. Kóliktiń ishinde oblys ortalyǵynyń turǵyndary – 24, 26 jáne 28 jastaǵy úsh jolaýshy bolǵan.
«Avtokólikti tekserý kezinde kóliktiń júk salatyn bóliginde jalpy salmaǵy 24 kg 160 gramm keptirilmegen marıhýana esirtki zaty salynǵan 4 polıpropılen qapshyq tárkilendi. Qazirgi ýaqytta esirtki quraldaryn asa iri mólsherde zańsyz saqtaǵany úshin sotqa deıingi tergeý amaldary bastaldy. Ustalǵandar óz kinálaryn moıyndady. Olar Merki aýdany polıtsııa bóliminiń ýaqytsha ustaý ızolıatoryna qamaqqa alyndy», – dedi oblystyq PD esirtki qylmysyna qarsy is-qımyl bóliminiń bastyǵy polıtsııa polkovnıgi Álim Bajyqbaev.
Buǵan deıin Jambyl turǵyny jabaıy qarasora jınap júrgen jerinen ustalǵanyn habarlaǵan bolatynbyz.
