Jambyl oblysynda 2025 jylǵa deıin 13 sý qoımasy salynady
Jambyl oblysynda 2025 jylǵa deıin 46,2 mln tekshe metr sý sıǵyza alatyn 13 sý qoımasy salynady. Bul týraly oblystyń sý sharýashylyǵy júıesin damytýǵa bólingen bıýdjet qarajatyn jumsaýdyń zańdylyǵy máseleleri qaraldy oblys prokýratýrasynyń alqa májilisinde aıtyldy, dep habarlaıdy Kazinfrom.
Jambyl oblystyq prokýratýrasy baspasóz qyzmetiniń habarlaýynsha, óńirdegi sý nysandaryna júrgizilgen tekserýler sý shyǵynynyń deńgeıi óte joǵary ekenin, gıdroqurylystardyń tozǵanyn, obektilerdi jóndeýge bólingen qarajattyń tıimsiz jumsalǵanyn, sondaı-aq sýdy únemdeýde eskirgen jáne tıimsiz tehnologııalar qoldanylǵanyn kórsetken.
Atalǵan zańbuzýshylyqtardy joıý úshin oblys prokýratýrasy Sý resýrstary jáne ırrıgatsııa mınıstrligine jáne oblys ákimdigine qadaǵalaý aktilerin engizdi.
Jol berilgen buzýshylyqtar úshin ýákiletti jáne jergilikti atqarýshy organdardyń birqatar laýazymdy tulǵasy jaýapqa tartyldy. Sondaı-aq jiberilgen qatelikterdi túzeý úshin tıisti sharalar qabyldandy.
Atap aıtqanda, transshekaralyq sýmen jabdyqtaý máseleleri boıynsha beıindi mınıstrlikke sýarý arnalary men gıdrotehnıkalyq qurylystardy aýqymdy qaıta qurý jónindegi Keshendi jospar joldandy.
Jospar sheńberinde óńirde 2025 jylǵa deıin kólemi 46,2 mln tekshe metr sý sııatyn 13 sý qoımasy salynady, qazirgi ýaqytta 3 sý aıdynynyń qurylysy bastaldy.
Sýmen jabdyqtaýdyń 13 obektisi boıynsha sý qorǵaý aımaqtary men beldeýlerin ornatý boıynsha jumystar júrgizildi, osy jumystardy júrgizý úshin aldaǵy jylǵa Jol kartasyn bekitilip, 1,1 mlrd teńge bólindi.
Sý tapshylyǵy bar aýdandarda jerasty sýlaryn belsendi paıdalaný boıynsha jumystar jalǵasýda.
Qabyldanyp jatqan sharalar kesheni vegetatsııalyq kezeńde sýarmaly sýǵa táýeldilikti transshekaralyq sý kózderinen 50% - ǵa deıin tómendetýge múmkindik beredi.
«Sonymen qatar jarııalanǵan tótenshe jaǵdaı nátıjesinde keltirilgen zalal týraly málimetterdi qalyptastyrýdyń zańdylyǵyn taldanyp, negizsiz shyǵystardyń aldyn alýdyń arqasynda 890 mln teńge Úkimettiń rezervine qaıtaryldy. Oblysty sapaly sýmen qamtamasyz etý máseleleri prokýratýra organdarynyń baqylaýynda qalady»,-delingen habarlamada.
