Jambyl oblysynda 19 kósheni sapasyz jóndegen kompanııa taǵy da tender alǵan
TARAZ. KAZINFORM – Bıyl Jambyl oblysynda jergilikti mańyzy bar avtojoldar men eldimeken kóshelerin jóndeýge 25,5 mlrd. teńge bólindi.
– Bul qarjyǵa 16,5 shaqyrym kóshe joldary men 1 kópirdiń qurylysy, 3 shaqyrym joldy qaıta jańǵyrtý jáne 671,0 shaqyrym joldardy orta jóndeý júrgizilýde. Osy jumystardyń nátıjesinde bıyl jaqsy jáne qanaǵattanarlyq jaǵdaıdaǵy jergilikti mańyzy bar avtojoldardyń úlesin 99 paıyzǵa, al eldimeken kósheleri boıynsha 87 paıyzǵa jetkizý kózdelgen, - deıdi bul jóninde Jambyl oblysy ákiminiń orynbasary Qanatbek Mádibek.
Búginde 357 jobanyń 252-sinde jóndeý jumystary aıaqtalǵan. 68 jobada jumystar júrgizilse, 15 jobada konkýrs rásimderi júrgizilýde. Al, 22 jobada jumystar áli bastalmaǵan. Mysaly, aýdandyq mańyzy bar «Otar-Sulýtór-Kóktóbe» avtojolynyń 0-16 shaqyrymyn ortasha jóndeý jumystary 2024 jyldyń mamyrynda bastalǵanymen, búginde 16 shaqyrymnyń tek 6,7 shaqyrymy, ıaǵnı, 42 paıyzyna ǵana asfalt tóselgen. Aıaqtalmaı qalý qaýpi bar.
Sondaı-aq Moıynqum aýdanynda 2023 jyldan ótpeli sanalatyn Kókjelek aýylyna kireberis jolynyń 4,7 shaqyrymyn orta jóndeý jumystary áli kúnge bastalmaǵan. Bul jobaǵa oblystyq bıýdjetten 70,2 mln teńge bólingen bolatyn. Osy sharýany qolǵa alǵan «DAUREN BUILD» JShS ótken jyly da oblysta 19 jobanyń jumystaryn sapasyz atqaryp, sońy úlken daýǵa ulasqan edi. Endi tapsyrys berýshi tarapynan sotqa talap-aryz joldanyp, sot protsesi bastaldy. Bul jerde de jumystar aıaqtalmaıdy.
Merki aýdanynda da qolǵa alynǵan 54 jobanyń 16-synda jumystar bastalmaǵan. Onyń 15-i «Aýyl – El besigi» jobasy boıynsha júzege asyrylýy tıis bolǵan. Bir qyzyǵy, 14 jobany bir-aq merdiger utyp alǵan, ol – «Qazaq joly 2050» JShS.
Bul rette Merki aýdanynda 2022 jyly 20 kóshede, 2023 jyly 16 kóshede jol jóndeý jumystary aıaqtalmaı qalǵanyn aıta ketken jón. ıAǵnı, ótken jylǵy kemshilikter bıyl da sabaq bolmaǵan. Jyl basynan Sapa ortalyǵymen 228 jerge zerdeleý jumystary júrgizilip, 962 synama alyndy. Nátıjesinde, 538 synamada sáıkessizdikter men kemshilikter anyqtalyp, olardy joıý boıynsha sharalar qabyldandy.
Aıta keteıik, buǵan deıin Jambyl oblysynda 1,5 mlrd teńgege jóndelgen 112 joldyń jaramdylyq merzimi kórsetilmegenin jazǵan bolatynbyz.
