Jambyl oblysynda 1,4 mlrd teńgeden astam qaryzǵa qatysty daý retteldi
ASTANA. KAZINFORM – Hımııalyq ónim jetkizýshi taýar aqysyn tolyq ala almaǵan soń sotqa júgingen. Taraptar qaryzdy 2026 jylǵy qarashanyń sońyna deıin úsh tólemmen óteý týraly kelisimge keldi. Bul týraly Kazinform tilshisi habarlaıdy.
Kásiporyndar arasyndaǵy yntymaqtastyq 2026 jylǵy qańtarda bastalǵan. Kelisimshart talaptaryna sáıkes, jetkizýshi hımııalyq ónimdi tapsyrýǵa, al satyp alýshy taýar aqysyn 30 kún ishinde tóleýge mindettengen. Jetkizýshi óz mindettemelerin tolyq oryndaǵanymen, satyp alýshy qarajattyń bir bóligin ǵana aýdarǵan.
Qaryz kólemi 1,4 mlrd teńgeden asty. Aqshany óndirip alý úshin jetkizýshi Jambyl oblysynyń mamandandyrylǵan aýdanaralyq ekonomıkalyq sotyna júgindi.
Sot talqylaýy barysynda taraptar daýdy medıatsııa arqyly rettedi. Satyp alýshy qaryzyn moıyndap, ony 2026 jylǵy qarashanyń sońyna deıin úsh tólemmen óteýge mindettendi. Sot kelisimdi bekitip, is boıynsha óndiristi toqtatty.
Eger satyp alýshy kelisim talaptaryn óz erkimen oryndamasa, jetkizýshi atqarý paraǵyn alyp, qaryzdy májbúrlep óndirip alý sharalaryn qoldanýǵa quqyly.
Eske salaıyq, buǵan deıin Taraz turǵyny urlanǵan kólikti satyp alyp, sot arqyly 6,5 mln teńgesin óndirip alǵanyn jazdyq.
Al Qazaqstan sottary toǵyz aıda 1,6 mln azamattyq isti qarady.
