Jambyl oblysynda 12 oqýshy tamaqtan ýlandy

ASTANA. KAZINFORM — Oqys oqıǵa búgin Jambyl oblysy Baızaq aýdany Myrzataı aýylynda boldy, dep habarlaıdy oblys ákimdiginiń baspasóz qyzmeti.

Oblys ákimdiginiń resmı habarlamasyna sáıkes 2025 jylǵy 11 qarasha kúni saǵat 11:07–de Baızaq aýdanynyń Myrzataı aýylynda orta mektep oqýshylarynyń tamaqtan ýlaný oqıǵasy tirkeldi.

Aýdandyq ortalyq aýrýhananyń málimetinshe, 11 qarasha tańerteń balalar mekteptiń qarsy betindegi jeke dúkennen satyp alǵan jyldam daıyndalatyn taǵamdardy (sendvıch, býrger, kırıeshkı) tutynǵan. Arada 1–2 saǵat ótken soń balalarda júrek aıný, qusý, bas aýrýy jáne álsizdik sııaqty ýlaný belgileri baıqalǵan.

— Barlyǵy 12 oqýshy Baızaq aýdandyq ortalyq aýrýhanasynyń juqpaly aýrýlar bóliminde tekseristen ótti. Balalardyń jaǵdaıy turaqty, nasharlaý belgileri joq. Qazir naýqastarǵa tıisti em-sharalar kórsetildi. Zerthanalyq tekserýler júrgizilip, ýlanýdyń sebebi anyqtalyp jatyr. Oblys ákiminiń tapsyrmasyna sáıkes, oblystyq bilim basqarmasynyń basshysy, aýdan basshylyǵy oqıǵa ornyna baryp, tıisti sharalar qabyldaýǵa kiristi. Jaǵdaı turaqty, baqylaýda. Balalar úılerine qaıtaryldy, — delingen habarlamada.

Osy oraıda ákimdik ata-analarǵa úndeý jasap, tez daıyndalatyn taǵamdardy tutynýǵa shekteý qoıýǵa keńes berdi.

— Balalaryńyzdyń densaýlyǵyn saqtaý úshin mektep mańyndaǵy dúkenderden nemese belgisiz jerlerden alynatyn daıyn taǵamdardy azaıtyp, úıde qaýipsiz ári paıdaly tamaq berińiz. Sondaı-aq, balalarǵa durys tamaqtanýdyń mańyzyn túsindirińiz. Balalardyń densaýlyǵy — bárimizdiń ortaq jaýapkershiligimiz, — dep eskertti vedomstvo.

Budan buryn Túrkistan oblysynda balabaqshadaǵy 24 bala taǵamnan ýlanǵanyn jazǵan edik.