Jambyl oblysynda 12 myńnan astam oqýshy mektep bitirý emtıhanyn tapsyrady

ASTANA. KAZINFORM — Óńirde qorytyndy attestattaý 28 mamyr men 16 maýsym aralyǵynda ótedi.

Bıyl bastaýysh synyp oqýshylary (1-4 synyptar) 24 mamyrdan bastap demalysqa shyǵady. 5–8 jáne 10-synyp oqýshylary 26-28 mamyr aralyǵynda bir pán — qazaq tilinen (aýyzsha jáne jazbasha format) aralyq emtıhan tapsyrady. Al 9-synyp (8 312 oqýshy) jáne 11-synyp (3 902 oqýshy) túlekteri qorytyndy attestatsııadan ótýi kerek. Barlyǵy 12 214 oqýshy emtıhan tapsyrady.

9-synyp túlekteri 4 emtıhan tapsyrady: qazaq tili, matematıka, orys tili jáne tańdaý boıynsha bir pán.

11-synyp túlekteri 5 emtıhan tapsyrady: algebra, qazaq tili, Qazaqstan tarıhy, orys tili jáne tańdaý boıynsha bir pán. 

Emtıhan qorytyndylary «Altyn belgi» tósbelgisi ıegerleriniń sanyna tikeleı áser etedi. Bıyl «Altyn belgige» 146 oqýshy, al úzdik attestatqa taǵy 209 oqýshy úmitker bolyp otyr.

Bıyl mektep túlekterine UBT tapsyryp, joǵary oqý oryndaryna túsýge bes múmkindik berilgen. Nátıjesi boıynsha memlekettik bilim grantyn alýǵa bolatyn eń mańyzdy synaq 16 mamyrda bastalady. Emtıhan tapsyrýǵa 3902 túlektiń 3240-y (82,1%) ótinish bildirgen. Olardyń barlyǵy testti eki ret tapsyrýǵa múmkindik alady. 

Bıylǵy jyly testileý «Qarasý» shaǵyn aýdany, № 5A mekenjaıy boıynsha ornalasqan Taraz qalasyndaǵy Ulttyq testileý ortalyǵynyń fılıalynda ótedi. Kún saıyn 490 túlek eki aýysymda (245 orynǵa eseptelgen aýdıtorııalarda) testileýden ótedi.

Bıyl elimizde sońǵy qońyraýdy ótkizý kúni ózgerdi. Osyǵan baılanysty UBT ótetin kúnder de ózgertildi.