Jambyl oblysynda 1100 tonna jabaıy qarasora joıyldy — Prokýratýra
TARAZ. KAZINFORM – Oblys jáne barlyq aýdandardyń ákimderi men quqyq qorǵaý organdary basshylarynyń qatysýymen zańdylyq pen quqyqtyq tártipti qamtamasyz etý boıynsha júrgizilgen Úılestirý keńesinde esirtki qylmysyna jáne nashaqorlyqqa qarsy is-qımyl boıynsha birlesken jumysty kúsheıtý boıynsha qosymsha sharalar aıqyndaldy. Bul týraly Jambyl oblysynyń prokýratýrasy málim etti.
«Esirtkisiz bolashaq» jobasy jáne Esirtkiniń zańsyz aınalymymen kúres boıynsha mekemearalyq jospardyń nátıjesinde esirtki qylmystary 15,2%-ǵa tómendep, 1100 tonnadan astam jabaıy qarasora joıylǵany atap ótildi, bul esirtkiniń elimizdiń basqa óńirlerine taralýynyń azaıýyna áser etti», — delingen habarlamada.
«NarkoShekteuTaraz» telegram-botynyń kómegimen 2986 esirtki saıttary buǵattalsa, 500-den astam graffıtı joıyldy jáne esirtkiniń jarnamasy boıynsha 26 qylmystyq is tirkeldi.
Bul jumysqa qoǵam belsindileri, eriktiler jáne stýdentter at salysyp otyr.
Esirtkiniń zańsyz aınalymymen aınalysqan 38 toptyń qyzmetine tosqaýyl qoıyldy, al kúshtik qurylymdar jumysynyń nátıjesinde esirtkini satýdy anyqtaý 24,7%-ǵa (93-ten 116-ǵa) ósti.
Sondaı-aq qylmysqa arandatýshylyqqa jol bermeý, memlekettik shekaradaǵy baqylaýdy kúsheıtýmen esirtki zerthanalaryn jáne UQT-ny anyqtaýdy arttyrý boıynsha sharalar aıqyndaldy.
Oblys prokýrory esirtki tutynýshylardyń statıstıkasy shyn mánindegi jaǵdaıdy kórsetpeıtinin atap ótti: 35 jasqa deıingi 709 jas esepte tur.
Bul rette, prokýrorlar oblystyq esirtki dıspanseri men densaýlyq saqtaý mekemeleriniń arasynda ózara baılanystyń bolmaýy saldarynan 156 esirtki tutynýshy esepke alynbaǵanyn anyqtady.
Búginde mundaı azamattardy esepke alýdyń jańa tetikteri engizildi.
Bıyl esirtkimen baılanysty 93 qylmysty joǵary jáne arnaıy bilimderi bar jumyssyz jastar jasaǵan.
Osyǵan baılanysty, Erbol Qarashókeev ákimderge jumyspen qamtý sharalaryn jandandyrýdy jáne esirtkige táýeldi tulǵalardy ońaltý ortalyǵynyń qurylys máselesin qarastyrýdy tapsyrdy.
Oblys ákimi esirtkiniń azaıýyna septigin tıgizgen qarasorany joıý jumystarynyń tıimdiligin oń baǵalap, bul jumysty kelesi jyly da jalǵastyrýdy jáne qarasorany óńdeý boıynsha arnaıy jobasyn júzege asyrý múmkindigin zerdeleýdi tapsyrdy.
Eske sala keteıik, buǵan deıin elordada jyl basynan beri 300-den astam esirtkige qatysty qylmys anyqtalǵanyn jazǵan bolatynbyz.
Jezqazǵanda esirtki jarnamalaıtyn 200 Telegram-kanal buǵattaldy.
Tekelide qoldan jasalǵan ádispen esirtki zattaryn daıyndaǵandar 10 jylǵa sottaldy.
Túrkistan oblysynda 4 esirtki zerthanasy joıyldy.
