Jambyl oblysynda 11-synyp oqýshysy bopsalaýǵa qatysty kúdikke ilindi

ASTANA. KAZINFORM – Jambyl oblysynyń Shý aýdanynda 11-synyp oqýshysyna 9-10 synyptyń birneshe oqýshysyn bopsalaǵany úshin qylmystyq is qozǵaldy.

Óńir prokýratýrasynyń málimetinshe, tergeý 19 qyrkúıekte QR Qylmystyq kodeksiniń 194-baby 2-bóliginiń 1-tarmaǵy boıynsha bastalǵan.

Prokýratýrada atap ótilgendeı, 2025 jyldyń alǵashqy segiz aıynda jasóspirimder arasyndaǵy qylmys 16%-ǵa azaıǵanymen, qyrkúıekten bastap kámeletke tolmaǵandarǵa qatysty qylmystar men sýıtsıd jaǵdaılary jıilegen. Sebepterdiń biri – ýákiletti organdardyń profılaktıkalyq jumysynyń jetkiliksizdigi.

Oblys prokýrorynyń tapsyrmasymen prokýratýra jáne memlekettik organdar ókilderinen turatyn arnaıy vedomstvoaralyq mobıldi top quryldy. Onyń mindeti – jasóspirimder arasyndaǵy quqyqbuzýshylyqtardy azaıtý, býllıng, sýıtsıd jáne bopsalaý faktilerin anyqtaý.

Qazirgi ýaqytta mobıldi top Baızaq jáne Jambyl aýdandaryndaǵy orta mektepterde tekseris júrgizip jatyr. Uqsas jumystardy Taraz qalasy men ózge de aýdandardyń prokýrorlary qolǵa alǵan.

Sonymen qatar, oblys prokýrory Nurǵalym Abdırov Taraz ben Shý aýdanynda úsh jasóspirimniń qaza bolýyna ákelgen qylmystyq isterdiń tergelýin jeke baqylaýǵa alǵan.

Buǵan deıin Tarazda óz synyptasyn óltirdi degen kúdikpen jasóspirim ustalǵany habarlanǵan bolatyn. Keıin Jambyl oblysynda qaza tapqan oqýshynyń anasy qaıǵyly oqıǵaǵa qatysty óz nusqasyn aıtqan edi.