Jambyl oblysynan 23 myń jyl burynǵy jádiger tabyldy
TARAZ. KAZINFORM – Jambyl oblysy Sarysý aýdanyndaǵy alǵashqy adamdardyń turaǵy – «Aqtoǵaı» úńgirinde tarıh ǵylymdarynyń doktory, ulttyq mýzeıdiń bas ǵylymı qyzmetkeri, akademık Jáken Taımaǵanbetovtyń jetekshiligimen halyqaralyq birlesken arheologııalyq ekspedıtsııa arheologııalyq ǵylymı-zertteý jumystaryn júrgizip jatyr.
Ekspedıtsııa quramynda Ulttyq mýzeıdiń, Nazarbaev ýnıversıtetiniń, AQSh-tyń Nıý-Iork ýnıversıtetiniń ǵalymdary jáne basqa da mamandar bar.
«Zertteý jumystary barysynda «Aqtoǵaı» úńgirinen 23 myń jyl burynǵy buıymdar tabyldy. Mundaǵy tastyń synyqtary, usaq maldyń súıekteri, taýtekeniń omyrtqalary tas dáýirine tán. Biraz súıekterdiń ázirge qandaı janýar nemese ańǵa tán ekeni belgisiz. Ol arnaıy zertteý nátıjesinde ǵana belgili bolady», – deıdi Jáken Taımaǵambetov.
Jalpy, halyqaralyq ekspedıtsııanyń bastalǵanyna 10 kún boldy. Bıyl munda Nıý-Iork ýnıversıtetiniń stýdentteri, doktoranttary da kelip, tájirıbeden ótip jatyr. Aldaǵy ýaqytta ashyq aspan astyndaǵy mýzeı bolýy da múmkin.
«Búgingi qazba jumystarynan shyqqan materıaldar alǵashqy adamdar shyn máninde osynda ómir súrgenin kórsetip otyr. Munda súıek qaldyqtary, eńbek quraldary, jaqqan ottyń oryndary, barlyǵy aıqyn kórindi. Bul ǵylymı jumystar budan da tereń júrgizilýi qajet ekendigin kórsetedi. Ol úshin áli de 10 jyldaı ýaqyt kerek», – deıdi «Tarıhı-mádenı eskertkishter qoryǵy jáne qalpyna keltirý dırektsııasynyń» dırektory Qýanysh Dáýirbekov.
«Aqtoǵaı» úńgiri jer deńgeıinen shamamen 60 metr bıiktikte ornalasqan. Ǵalymdardyń zertteýi boıynsha jalpy Qarataý taý júıesinde barlyǵy 95 úńgir anyqtalǵan. Al halyqaralyq birlesken arheologııalyq ekspedıtsııanyń ǵylymı zertteý jumystary áli de jalǵasady.
