Úkimettik jumys toby Jambyl oblysynda jer silkinisinen zaqymdanǵan nysandardy aralady
TARAZ. KAZINFORM – Premer-Mınıstrdiń tapsyrmasy boıynsha Tótenshe jaǵdaılar vıtse-mınıstri Kegen Tursynbaev bastaǵan úkimettik jumys toby Jambyl oblysyna jetti. Bul týraly QR TJM baspasóz qyzmeti málim etti.
TJM málimeti boıynsha top quramynda TJ aldyn alý komıtetiniń tóraǵasy Serik Júnisbekov, TJ joıý Departamentiniń bastyǵy Azamat Júnisov, QR TJM Qazseldenqorǵaý MM basshysy Erbolat Sádirbekov jáne SBjUZǴO basshysy Dáýren Sársenbaev bar. Mamandar jer silkinisiniń saldaryn taldaıdy jáne olardy joıý sharalaryn úılestiredi.
— Búgin tańerteń Merke aýylynda delegatsııa zardap shekken áleýmettik nysandardy qarap, olardyń jaǵdaıyn baǵalap, halyqtyń qaýipsizdigin qamtamasyz etý úshin birinshi kezektegi qadamdardy belgiledi. Jedel shtab jumysy aıasynda TJM jáne jer asty dúmpýleri sezilgen aýdandardyń jergilikti atqarýshy organdar ókilderiniń qatysýymen keńes ótti. Aǵymdaǵy seısmıkalyq jaǵdaıdy, qalpyna keltirý jumystarynyń barysyn jáne zalaldy azaıtý sharalaryn talqylady. Ǵımarattardyń qaýipsizdigine, turǵyndarǵa ataýly kómekke jáne ınfraqurylymdy qoldaýǵa erekshe nazar aýdarylady, — delingen vedomstvo habarlamasynda.
TJM málimetinshe, azamattyq qorǵaý kúshteri tolyq daıyn. Qutqarýshylar, dárigerler men ınjenerler jaǵdaıdy baqylaýdy jalǵastyrýda, kómek kórsetedi jáne ótinishterge jedel den qoıady.
Eske sala keteıik, buǵan deıin Almatydan 323 shaqyrym jerde jer silkinisi tirkelgenin jazǵan bolatynbyz. Eseptelgen qarqyndylyǵy Merki aýylynda — 5.0 ball, Qulan aýylynda — 4.0 ball, Shý qalasynda — 2.0 ball shamasynda bolǵan.
Buǵan deıin habarlanǵandaı, seısmıkalyq ahýaldy baqylaý jónindegi jedel shtab 24/7 tártibinde jumys istep jatyr.