Jambyl oblysy Jumyspen qamtýdy úılestirý basqarmasyna basshy taǵaıyndaldy
Jambyl oblysy ákiminiń ókimimen Erkin Kelesov Jambyl oblysy ákimdiginiń Jumyspen qamtýdy úılestirý jáne áleýmettik baǵdarlamalar basqarmasynyń basshysy bolyp taǵaıyndaldy, dep habarlaıdy Kazinform oblys ákimdiginiń baspasóz qyzmetine silteme jasap.
Erkin Egemberdiuly 1964 jyly Taraz qalasynda týǵan.
1993 jyly Shymkent kásiptik ýchılışesin «ónerkásip kásipornynyń býhgalteri», 2000 jyly M.H.Dýlatı atyndaǵy Taraz memlekettik ýnıversıtetin «býhgalterlik esep jáne aýdıt» mamandyqtary boıynsha bitirgen.
Eńbek jolyn 1993 jyly Jambyl oblysy boıynsha salyq ınspektsııasynda aǵa salyq ınspektory bolyp bastaǵan.
Ár jyldary Jambyl oblysy boıynsha salyq komıtetinde bólim bastyǵy, salyq departamentinde basqarma bastyǵy, Baızaq aýdany boıynsha salyq basqarmasynyń bastyǵy, Taraz qalasy boıynsha salyq basqarmasynyń bastyǵy, Jambyl oblysy boıynsha Memlekettik kirister departamentiniń jetekshi mamany, Jambyl aýdany ákimdiginiń jumyspen qamtý jáne áleýmettik baǵdarlamalar bóliminiń basshysy laýazymdarynda eńbek etken.
2022 jyly Jambyl oblysy ákimdiginiń Jumyspen qamtýdy úılestirý jáne áleýmettik baǵdarlamalar basqarmasynyń basshysy, 2023 jyldan bastap búgingi kúnge deıin oblys ákimdiginiń memlekettik satyp alý basqarmasynyń basshysy qyzmetin atqaryp keldi.
