Jambyl oblysy seısmıkalyq apattarǵa daıyn ba

ASTANA. KAZINFORM — Jambyl oblysynyń ákimi Erbol Qarashókeev óńirdiń tabıǵı tótenshe jaǵdaılar kezindegi qaýipsizdigi jóninde tilshiler suraǵyna jaýap berdi.

Onyń aıtýynsha, iri jer silkinisi bolǵan jaǵdaıda óńirlik qyzmetter jedel áreket etýge jáne úılesimdi jumys isteýge tolyqqandy daıyn.

— Sońǵy 2 jylda óńirde jeńil jáne ortasha 4-5 jer silkinisi tirkelgen. Qazir oblysta jeti seısmobeket jumys isteıdi. Biz olardy baqylap otyrmyz jáne TJD-men birlesip jumys júrgizip kelemiz. Jalpy alǵanda, daıyndyq jumystary baqylaýǵa alyndy. Eger úlken jer silkinisi bolsa, ózimizdi daıynbyz dep esepteımiz, — dedi E. Qarashókeev Astanada ótken brıfıngte.

Oblys ákimi keltirgen derekterge sáıkes, óńirde zardap shekkenderdi qabyldaıtyn 423 pýnkt bar. Budan bólek, toǵyz gýmanıtarlyq qabyldaý pýnkti jáne aýdandarda qoqys tastaýǵa arnalǵan segiz oryn, máıitterdi jerleýge arnalǵan alty oryn belgilengen.

Halyqty habardar etý úshin 145 dabyl qaǵatyn qural, 95 daýys zoraıtqysh sırena jáne 50 elektrlik sırena qoldanylady. Budan bólek, polıtsııanyń patrýldik kólikteri de jumyldyrylady.

— Biz Almaty men Astanadaǵydaı úlken ári yńǵaıly júıeni engizýdi josparlap otyrmyz. Bul qomaqty qarajatty qajet etedi. Qazir de qoldanystaǵy sırenalar men evakýatsııalyq pýnkterdiń daıyndyǵyn júıeli túrde tekserip otyramyz, — dep túsindirdi oblys ákimi.

Ákim sońǵy jer silkinisterinen eshkim zardap shekpegenin atap ótti. Tek birneshe áleýmettik nysan búlingen, olar bıýdjet esebinen qalpyna keltirilgen.

Buǵan deıin Erbol Qarashókeev kámeletke tolmaǵandar isteri jónindegi ınspektorlardyń jalaqysy kóteriletinin aıtqan edi.

Sondaı-aq, 6 jasar bala óliminen keıin bas dáriger jumysynan bosatyldy.